Ministrja e Arsimit Evis Kushi ka dhënë më herët këtë javë një intervistë lidhur me shkollat dhe Universitetet.
Kur këta të fundit po zhvillojnë mësim online, ministrja përjashtoi mundësinë që edhe shkollat e mesme dhe 9-vjeçare të drejtohen drejt kësaj metode.
Kushi nuk dha një shifër se sa mësues dhe nxënës janë të infektuar por tha se janë 1000 mësues në dispozicion, ndërsa mësuesit e tjerë po paguhen për të gjitha orët shtesë, gjë për të cilën opozita ka akuzuar se nuk ka ndodhur kështu.
‘Nga 1760 shkolla, 1100 shkolla e zhvillojnë vetëm me një turn. Turnet 2-3 apo katër kemi për ata nxënës që vijnë nga shkollat e dëmtuara nga tërmeti, që detyrohen të shkojnë në shkollat pritëse dhe ne u subvencionojmë pagesën e transportit. Të gjithë mësuesit që zhvillojnë mësim me disa turne, po paguhen të gjithë mësuesit’.
E pavarësisht deklaratës së saj, realiteti vijon të jetë i hidhur dhe koronavirusi të përhapet në shkollë.
“Balkan Web” raporton se nga 41 rastet e infektimit në Korçë, të konfirmuara një ditë më parë, tre prej tyre janë mësues dhe një edukatore. Mësuesit japin mësim në shkolla të ndryshme, dy prej tyre në fshatra dhe një në qytet.
Ndërkohë, pjesa tjetër e të infektuarve janë kontakte të infektimeve të fundit dhe vatra të reja.
Denoncime të shumta kanë mbërritur në redaksinë tonë, ku na raportohet se edhe në shkollat më në zë të Tiranës ka mungesë të theksuar të kushteve dhe masave mbrojtëse të pandemisë, siç janë mungesa e dezinfektantëve për duart që supozohet të bëhet çdo mëngjes në hyrje të shkollës.
Rujtja e distancës dhe mbajtja e higjienës, janë dy kushtet bazë për të mos u rrezikuar nga infektimi me Covid-19. Disa drejtues shkollash në shtetet fiqnje si për shembull në Itali, kanë ngritur shqetësimin se në shumë institucione distanca nuk mund të ruhet, sepse nuk ka klasa mjaftueshëm dhe nuk janë siguruar banka një vëndëshe për nxënësit. Për këtë arsye ata kanë kërkuar shtyrjen e hapjes së shkollave deri sa gjithçka të jetë në rregull, ndërsa në vendin tonë duket se kjo gjë nuk i shqetëson aspak drejtuesit.
Zhvillimi ynë nuk mundet kurrsesi të krahasohet me atë të shteteve fqinje, ndaj nuk mund të mendojmë se ne i kemi marrë të gjitha masat për ruajtjen e distancës. Të gjithë e dimë se shkollat në vendin tonë kanë kaluar përtej kapaciteteve dhe për këtë arsye qeveria u detyrua të vendosë që orari mësimor të zhvillohet me 4 turne gjatë kësaj kohe. Për nxënësit që duhet të studiojnë gjatë turnit të fundit me siguri mësimdhënia nuk do të rezultojë aspak efektive, sepse kjo gjë është e vërtetuar edhe shkencërisht se rendimenti bie me kalimin e orëve.
Sakaq, shumica e shkollave në Shqipëri prej kohësh nuk sigurojnë as kushtet më minimale të higjienës, si mungesa e ujit të rrjedhshëm, sapunëve e detergjentëve të tjerë. Autoritetet nuk kanë dhënë asnjë detaj në lidhje me këtë gjë, duke u shprehur vetëm se shkollat që nuk sigurojnë kushtet nuk do të hapen. Sa do të ndodhë kjo gjë pritet ta shohim.
