Mbarë opinioni publik u shokua ditën e djeshme kur 13- vjeçari nga Dibra u gjet i vetëvarur në një pemë.
I mituri me inicialet F.R u gjet i varur pa shenja dhune në trup dhe grupi hetimor i policisë po vazhdon hetimet për zbardhjen e ngjarjes.Sipas burimeve të policisë së Dibrës komshinjtë e familjes së të miturit kishin dëgjuar debate të forta në shtëpi para se ai të gjendej i vdekur.
Ata gjithashtu thonë së fëmija është larguar nga shtëpia menjëherë pasi ka debatuar më prindërit.
“Fillimisht dyshuam se kishim të bënim me një vrasje, por nga hetimet paraprake rezulton se i mituri F.R është vetëvarur me një litar. Ne po hetojmë të dyja pistat, por kjo ngjarje më shumë konsiderohet si vetëvarje” – kanë deklaruar burimet zyrtare të policisë.
Nga ana tjetër prindërit e adoleshentit nuk kanë dhënë akoma një deklaratë pasi po merren me ceremoninë e varrimit të të birit.
Thuhet se në orët e pasditës 13- vjeçari është parë duke luajtur me moshatarët e tij futboll dhe pas përfundimit të lojës ai është drejtuar për në shtëpi. Por gjatë lojës njërit nga bashkëmoshatarët e tij i kishte humbur një varëse floriri dhe dyshonte se e kishte gjetur ai. Shoku i ka kërkuar atij t’i kthejë varësen, por 13 vjeçari e ka mohuar se e ka gjetur dhe është nisur për në shtëpi.
Mirëpo bashkëmoshatari i tij i ka shkuar pas deri në shtëpi duke i kërkuar t’i kthejë sendin e humbur edhe në sy të prindërve.
Gjithashtu edhe prindërit kanë besuar se ai e kishte gjetur dhe i kanë kërkuar ta nxjerrë varësen e shokut. Sipas gazetës “Panorama” djali është mërzitur pasi prindërit nuk e kanë besuar dhe është larguar menjëherë nga shtëpia.
Më vonë kur ra nata prindërit kanë dalë ta kërkojnë, por nuk e kanë gjetur të birin 13-vjeçar, por të nesërmen në mëngjes e kanë gjetur të varur mbi një kumbull.
