Një ngjarje e rëndë ka ndodhur në Tiranë ku një efektiv policie ushtroi dhunë ndaj një adoleshenti që kishte thyer karatinën dhe po me lëvizte biçikletë pas orës 17:30 në zonën e liqenit.
Videoja me pamjet e dhunës që ishte regjistruar nga një qytetar u bë shumë virale, ndërkohë që mësohet që polici me iniciale G.N është pezulluar nga puna dhe për tre të tjerë që ishin bashkë me të kanë nisur hetimet nga Shërbimi për Çështjet e Brendshme dhe Ankesave.
Kjo video ka ngjallur një reagim publik të jashtëzakonshëm. Madje ka reaguar edhe UNICEF, duke e cilësuar të papranueshme dhunën ndaj të miturit dhe kërkoi nisjen e hetimit për këtë rast.
Gjithashtu ka reaguar edhe Avokati i Popullit, i cili shprehet se akti në fjalë është i patolerueshëm e kërkon marrjen e masave urgjente ndaj efektivëve që kanë bërë veprimin.
“Veprimet e dhunshme të kryera nga punonjësit e rendit publik janë të patolerueshme dhe AP kërkon nga organet kompetente të ndërmarrin veprimet urgjente karshi këtyre punonjësve, në përputhje me legjislacionin në fuqi”, thuhet në njoftimin e zyrës së Avokatit të Popullit.
Avokati i popullit ka shtuar se: “Askush nuk duhet të detyrohet të zgjedhë papajtueshmërinë me ligjin. Autoritetet duhet të garantojnë sigurinë e të gjithë qytetarëve të tyre, sidomos të fëmijëve, qoftë nga rreziku i infektimit prej virusit, ose nga dhuna, e cila gjen strehë në këtë periudhë të kufizimit drastik të lëvizjeve”
Policia e Shtetit deklaron se pavarësisht se u lirua, adoleshenti që u dhunua u ndëshkua me masë administrative, gjobë sipas Aktit Normativ. Kjo, pasi ai së bashku me shokun e tij “u konstatuan se kishin thyer orarin e ndalim-qarkullimit dhe kishin dalë për shëtitje me biçikletë në shkelje të masave për parandalimin e pandemisë COVID-19” thotë policia.
Ndërkohë mësohet se i mituri quhet Sarandi Çobo dhe është vetëm 15 vjeç. Ai është shprehur se kur është përballur me policinë, iu kishte thënë atyre që kishte humbur rrugën, por policët nuk e kishin besuar.
