Mbrëmjen e djeshme u luajt ndeshja mes Nigerisë dhe Argjentinës ku triumfoi kjo e fundit me rezultatin 1-2. Një ndeshje emocionuese që i mbajti të gjithë peshë deri në momentin e fundit, pasi ishin me rezultatin e barabartë 1-1, por goli i Marco Rojos bëri diferencën në minutën e fundit.
I pranishëm në stadium ishte edhe legjenda e futbollit argjentinas Diego Maradona, i cili ishte shumë i përfshirë emocionalisht gjatë gjithë ndeshjes. Pas golit të dytë të bërë nga futbollisti argjentinas Rojos, Maradona festoi në një mënyrë jo të zakonshme. Ai shpërtheu në të shara dhe iu tregoi gishtin e mesit tifozëve të Nigerisë.
Mirëpo menjëherë pas ndeshjes Maradona është shoqëruar për në spital pasi ka pasur vështirësi në ecje gjatë daljes nga stadiumi. Madje në një video të publikuar në rrjetet sociale shihet se ai mbahet për krahu dhe nuk arrin do të ulet në kolltuk.
Pasi ka marrë ndihmën e duhur mjekësore Diego Maradona ka treguar se ëshët në gjendje të mirë shëndetësore. Ai ka zbuluar se ka pasur dhimbje qafe dhe probleme me zemrën dhe se doktori i kishte rekomanduar që të shkonte në shtëpi pas pjesës së parë.
“Dua t’ju them se jam mirë, se nuk jam në spital e as nuk jam shtruar më herët”, ka shkruar ai në llogarinë e tij në rrjetet sociale.
Madje ka thënë se nuk e mori parasysh rekomandimin e mjekut pasi donte të ishte dëshmitar i kualifikimit të Argjentinës në mesin e 16 skuadrave më të mira.
“Më kontrolloi doktori dhe më rekomandoi të shkoja në shtëpi pas pjesës së parë, por doja të qëndroja sepse po rrezikonim. Si të largohesha? Puthje për të gjithë, faleminderit për përkrahjen.”, ka shkruar Maradona.
Fitorja e mbrëmjes së djeshme e dërgoi Argjentinën në kategorinë e 1/8 ku do të takohet me Francën.
