Prokurori që ngriti çështjen kundër Harry Maguire, i cili u vu në pranga pas një sherri në ishullin grek të Mykonosit, ka hedhur poshtë hipotezën se futbollisti kishte frikë për jetën e tij gjatë arrestimit, ndaj edhe kundërshtoi forcat e policisë.
Policia greke thotë se e trajtoi atë “si çdo britanik tjetër të dehur”, një javë pas dënimit për sulm ndaj oficerëve dhe përpjekjes për ryshfet.
Maguire, 27 vjeç, këmbëngul se ai ishte duke mbrojtur motrën e tij Daisy, 20, nga dy burra shqiptarë që i injektuan asaj drogë. Ai tregoi se mendoi që e kishin rrëmbyer disa oficerë të rremë dhe u përpoq të ikte i frikësuar për jetën e tij.
Por duke folur për “Good morning Britain”, prokurori Ioannis Paradissis thotë se policia iu prezantua Z. Maguire, dhe se ky i fundit po e përdor pasurinë e tij për të shmangur përgjegjësinë për veprimet e tij. Sipas tij, ai u largua me vrap për të thirrur agjentin e tij dhe la pas të fejuarën dhe motrën.
“Unë dyshoj se ai kishte frikë për jetën e tij. Policët dëgjuan një lloj trazire, argumenti që po zhvillohej dhe ata thjesht shkuan atje për të ndaluar sherrin, ata thjesht shkuan atje për ndihmë”.
Prokurori gjithashtu tha se ka dëshmitar okular që vërteton se oficerët menjëherë iu prezantuan futbollistit- diçka që Maguire thotë se nuk ndodhi.
Kur u pyet pse gjyqi përfundoi kaq shpejt, Paradissis tha: “Gjyqi fillestar zgjati mbi gjashtë orë, që është një kohë e madhe për këtë lloj gjykimi”.
“Ishte një lloj gjykimi i thjeshtë, ishte si rasti i turistëve që pinë keq për pushime, sulmojnë policinë dhe më pas përpiqen të përdorin pasurinë e tyre për të dalë nga ato që kanë bërë. Ishte një rast i thjeshtë, zgjati gjashtë orë, kishte dëshmitarë okularë dhe kjo është arsyeja pse ndodhi kaq shpejt, sepse të gjitha provat janë atje. Ajo që ka tronditur njerëzit është se ata janë përpjekur të përdorin pasurinë e tyre, pozicionin e tyre, për të dalë nga kjo dhe kjo është mjaft tronditëse”.
Kapiteni i Manchester United ka pohuar se oficerët nuk pranuan të identifikohen gjatë arrestimit të tij.
Maguire i tha BBC në një intervistë javën e kaluar se ai mendoi që po e rrëmbenin dhe u përpoq të ikte “nga frika për jetën e tij” kur mbërritën oficerët.
Por njëri prej oficerëve ka hedhur poshtë gjithçka duke thënë për The Sun: “Ne nuk e trajtuam atë ndryshe nga djemtë e të tjerë britanikë të dehur. Ky ishte thjesht një djalë i dehur që zihej. Ne merremi shumë me raste të tilla, por është shndërruar në diçka tjetër, me gjithçka që ai thotë. Pse tetë policë do ta rrethonin dhe nuk do ta identifikonin veten? Ne do të humbnim punët tona”!
Këto deklarata vijnë vetëm disa ditë pasi Maguire dha intervistën e tij të parë që pas dënimit me kusht. Futbollisti britanik njoftoi të mërkurën se ai po apelon vendimin e marrë kundër tij në një gjykatë në ishullin e Siros dhe tani po përballet me një rigjykim.
Maguire, i cili i kërkoi BBC të mbajë sekretin e vendndodhjes së tij, u zotua të luftojë për të pastruar emrin: “Unë jam me të vërtetë i sigurt se e vërteta do të thuhet”.
/Daily Mail
