Një ngjarje tronditëse e ndodhur pak ditë më parë në Durrës, ku bashkëshorti vrau bashkëshorten në moshën 40 vjeçare duke lënë 6 fëmijë jetimë, shokoi mbarë opinionin publik.
Pas kësaj tragjedie burri u dorëzua në polici duke thënë se e kishte shtyrë gruan pas një sherri dhe nuk e dinte se kishte vdekur.
“Fundjavë ndryshe” është drejtuar menjëherë për tek fëmijët, të cilët ndodhen në gjendje të mjerueshme dhe bëjnë apel për ndihmë.
“Dua të ndjek rrugën e saj, rrugën e mamit. Ajo ka vuajtur jashtë mase. Ajo na la, vdiq për ne, që ne të jemi më mirë se më përpara. Ka qënë bota për ne. Edhe bukën që hante, nuk e hante pa ardhur ne. Ka qënë mbështetja më e madhe që kemi pasur. Ka qënë motra ime, jo mamaja ime, me të hapesha më shumë. Më mungon jashtë mase, edhe pse kam motrat, te ajo shprehja çfarë kisha”.
Ne jemi në punë, unë, vëllai dhe motra e dytë. Kemi qënë të detyruar të punojmë, por tani jemi akoma më shumë. Duhet të vazhdoj edhe shkollën, duhet të kem akoma më shumë forcë tani që jam kreu i shtëpisë, bashkë me vëllain. Nuk kam çfarë bëj tjetër, thjesht kërkoj ndihmë. Të më ndihmoni me sa keni mundësi, që edhe unë ta përballoj, deri sa të rregullohemi. Pastaj do të jemi të fortë. Do të punojmë e do mundohemi që familja të jetë sa më mirë” – është shprehur vajza e madhe e familjes.
Ndërkohë djali i madh ka bërë apel që të ndihmohen për ndërtimin e një shtëpie të re sepse shtëpia e tyre është në gjendje të mjerueshme.
“Puna ku punoj nuk mjafton për shtëpinë tonë dhe ne kërkojmë ndihmë. Ne duam që të ndërhyni në shtëpinë tonë, me aq sa keni mundësi. Siç e shikoni shtëpia jonë është e shkatërruar, e prishur, e pasuvatuar dhe në gjendje të mjerueshme” – tha djali.
