Jay Z duket se do t’i zbulojë të gjitha sekretet e jetës së tij me albumin më të fundit “4:44”. Pas tradhtisë së Beyonce-s, një tjetër këngë e quajtur “Smile” (Buzëqesh) zbulon anën e panjohur të zonjës Carter.
“Mami bëri katër fëmijë, por është lesbike/ aq gjatë u shtir saqë tani është mjeshtre teatri”, thotë ai në këtë këngë.
“Iu desh të fshihej në dollap, që të kurohej/ Turpi nga shoqëria dhe dhembja nuk duroheshin/ Qava nga gëzimi kur ti u dashurove/ S’ka rëndësi për mua në ishte “ai” apo “ajo””, vazhdon më tej.
Në këtë këngë merr pjesë edhe vetë Gloria, me një monolog prekës mbi “të jetuarit e fshehur” derisa më në fund, zbuloi se është lesbike.
“Të jetosh e fshehur. E imagjinoni dot ç’do të thotë të bësh këtë jetë? Kur fshihesh, njerëzit të shikojnë si të lumtur, të lirë, sepse ti kërkon të të shikojnë kështu. Kur jeton dy jetë je e lumtur, por nuk je e lirë ti fshihesh nga frika se do të të lëndojnë familjen, apo dikë të dashur për ty”, shprehet ajo.
“Por bota po ndryshon dhe thonë se tani, mund të jemi të lirë. Por ti jeton me frikën e të qenit vetja. Kur ke jetuar nën hije, të duket vendi më i sigurtë. Nuk lëndohen ata, nuk lëndohem as unë. Por jeta është e shkurtër, është koha për të qenë e lirë. Dashuro atë që dashuron, sepse jetën nuk e ke të sigurt”.
Burimi: Daily Mail
