Alfred Peza ka dhënë dorëheqjen nga posti i drejtorit të Radio Televizionit Shqiptar. Ai ka dorëzuar dorëheqjen te Këshilli drejtues i RTSH-së, teksa drejtimi i tij u shoqërua me skandale dhe denoncime të shumta.
Gjatë drejtimit të tij, u shkarkuan nga puna dhjetëra gazetarë, kameramanë dhe moderatorë emisionesh, të cilët u zëvendësuan me njerëz të afërt e të besuar të Pezës. Një prej tyre dhe ajo që bëri më shumë bujë ishte shkarkimi nga puna një punonjëse, e cila është nënë e një fëmije autik.
Disa prej personazheve kanë folur publikisht për këto padrejtësi që bëheshin në RTSH, siç ishte rasti i gazetarit Bledi Strakosha, regjisores Arnita Beqiraj, dhe së fundi virale u bë dhe denoncimi i Alketa Vejsiut. Kjo e fundit në një qëndrim publik në rrjetet e saj sociale, do të denonconte dhe akuzonte Pezën për sjellje çnjerëzore dhe antiligjore në drejtim të partneres së babait të saj, e cila punonte në RTSH për 30 vite.
Ajo kishte marrë leje pa të drejtë page nga puna, për të qëndruar pranë bashkëshortit të saj në ditët e fundit të jetës, por pas humbjes së tij u përball dhe me pushimin nga puna. Më shumë sesa faktori ekonomik, që Vejsiu tha se zonjës nuk do ti mungonte, ajo e akuzonte Pezën për sjelljen e tij brutale. Ndërkohë që një tjetër akuzë që është bërë së fundi në drejtim të Pezës, lidhet me realizimin e festivalit të këngës në RTSH, i cili ishte më i shtrenjti në histori për nga kostot por jo më i arriri për nga realizimi.
Emërimi i Pezës shkaktoi shqetësim për pavarësinë politike për shkak të angazhimit të tij të mëhershëm në Partinë Socialiste.
*Nuk dihet se cili do të jetë zëvendësuesi i Pezës në këtë detyrë, për të mbajtur nën kontroll televizionin kombëtar, që i shërben propagandës së Qeverisë.
