Pas plagosjes me armë zjarri nga anëtarët e grupit Babastars, Noizy e mbajti fjalën duke mbajtur koncertin e paralajmëruar në Ferizaj, edhe pse atë në Mitrovicë jo, për shkak të procedurave në polici.
Koncerti ishte i stërmbushur me fansa të reperit nga Shqipëria. Në një video të xhiruar në Ferizaj, Noizy edhe pas plagosjes dëgjohet duke kënduar këngën “Jena Mbretër”, këngë kjo e cila ishte bërë disa vite më parë kundër anëtarëve të Babastars.
Më pas ai dëgjohet teksa bërtet “F*** Babarecords”, një pjesë të regjistruar që Noizy e rikthen mbi katër herë, duke marrë kështu mbështetje edhe nga publiku. Edhe pse ai nuk e jepte veten dhe dukej shumë energjik, Noizy-t i është hequr një plumb nga trupi në klinikën e Ortopedisë.
Denis Hajri, i njohur si Varrosi, mbeti gjithashtu i plagosur gjatë përleshjes që ndodhi të martën ndërmjet reperëve shqiptarë në Prishtinë. Ai ndodhet në QKUK në repartin e kirurgjisë abdominale, ku pritet të merret vendimi për trajtimin e mëtutjeshëm.
Burime të “Telegrafit” thonë se atij i janë bërë dy CT në Radiologji që kanë treguar se nuk i janë prekur organet vitale dhe se plumbi ndodhet në lëkurë.
Ndërkohë, të arrestuar pas kësaj përleshje me armë mbeten, reperi Cozman (Ylber Abdullahu) Visar Abdullahu (vëllai i Cozman) dhe një mik i ngushtë me reperin, Albert Krasniqi, i cili është dhe bashkëshorti i Miss Kosovës 2006, Besa Gashi. Ata janë vënë nën masën e ndalimit nga policia për 48 orë.
“Visari, Ylberi dhe Alberti janë ndaluar nga policia dhe u është raportuar masa 48 orëshe me vendim të prokurorisë së Prishtinës. Paraburgimi është caktuar nën dyshimin se është kryer vepra e tentivës së vrasjes”, tha avokati Asdren Hoxha.
Hoxha ka treguar se Cozman në deklaratën e tij në polici ka thënë se ka ndodhur një përleshje të cilën, “ nuk e ka dëshiruar”. Avokati ka mohuar mundësinë që klienti i tij të ketë përdorur armën nga e cila reperi nga Shqipëria, Noizy mbeti i plagosur me një plumb dhe u dërgua për trajtim mjekësor në QKUK.
