“Kënga Magjike” nuk solli vetëm art, por edhe “përplasje” mes artistëve. Pas përballjes që vëllezërit Endri e Stefi Prifti patën me këngëtarin Bruno, ku ndërhyri edhe kompozitori Flori Mumajesi, tashmë ata kanë gjetur “paqen”.
Vëllezërit korçarë i janë afruar skenës ku Artiola Toska dhe Bruno janë ngjitur për të kënduar këngën “Mirëmëngjes dashni”, për t’u dhënë dorën e për t’u kërkuar falje këtyre të fundit.
Ka qenë Stefi ai që e ka marrë fjalën, duke u shprehur se keqkuptime ndodhin dhe se qëllimi i tyre nuk ka qenë aspak për të fyer këngëtarët. Madje, ai i është drejtuar Ardit Gjebreas duke i thënë se duhet ndryshuar formula e votimit, në mënyrë që të mos ketë më keqkuptime të tilla.
Një tentativë kjo për të zbutur gjakrat, e cila nuk dihet si është pritur nga dyshja e prekur, Artiola dhe Bruno.
Në fund ata kanë kënduar këngën hit të këtij edicioni të “Këngës Magjike”, të shoqëruar edhe nga korçarët.
