“Dëshmitarët e Jehovait” kanë reaguar sot përmes një deklarate për ngjarjen tragjike që ndodhi në Kombinat, ku nëna me dy vajzat u vetëflijuan për t’u ringjallur në një jetë më të mirë.
Në reagimin e bërë sot publik, zëdhënësi Arben Lubonja thotë se anëtarët e familjes Josifi jo vetëm që nuk kanë qenë pjesë e organizatës por as nuk janë shoqëruar ndonjëherë me Dëshmitarët e Jehovait.
“Po informojmë mediat dhe opinionin e gjerë që po ndjek zhvillimin e këtyre ngjarjeve, se pjesëtarët e familjes Josifi jo vetëm që nuk kanë qenë pjesëtarë të organizatës tonë, por as nuk janë shoqëruar ndonjëherë me Dëshmitarët e Jehovait”.
Më tej në deklarëte thuhet se përpjekjet për ta lidhur këtë ngjarje, apo çdo element tjetër të saj me besimin e Dëshmitarëve të Jehovait është krejtësisht e pabazë, madje fyese për besimin tonë.
“Dëshmitarët e Jehovait kanë pikëpamjen e Zotit për jetën dhe e çmojnë atë si gjënë më të shtrenjtë. Vetëvrasje me pretendimin për të shkuar në një jetë më të mirë, nuk përputhet në asnjë mënyrë me besimine ‘Dëshmitarëve të Jehovait’”.
Nënë e bijë, Zhaneta dhe Anisa, u gjetën të pajeta, dhe sipas ekspertizës mjeko-ligjore shkaku i vdekjes ka qenë mosushqyerja.
Nëna e ka mbajtur vajzën Anisa të pajetë prej muajsh në shtëpi, duke pritur për ringjalljen e saj dhe duke e lyer me vajra për të mos u dekompozuar.
Fatmirësisht vajza tjetër Blerta ndodhet në spital, nën mbikëqyrjen e mjekëve.
