Dy ditë më parë u mësua se gazetari dhe moderatori i njohur, Adi Krasta, nuk do të ishte më pjesë e “News 24”.
Në media u përfol se largimi i tij erdhi nga Kryeministri Rama, pasi supozohej se ai kishte bërë opozitë gjatë gjithë kohës me emisionin e tij.
Pas largimit të tij, aktori i njohur i humorit, Julian Deda, i ka dalë në krah Krastës me një postim në Instastory.
“Ky njeri nuk ka nevojë për mbrojtje, sepse e mbron intelekti, personaliteti dhe liria brenda tij.
Ps: O Adi Krasta, o armik”- shkruan Juli me ironi krahas fotos me gazetarin, duke treguar se është në anën e tiij.
Kujtojmë se pas largimit të Krastës nga emisioni, reagoi edhe Enkel Demi, i cili në një status të gjatë ironizonte largimin e tij.
“Meqë me shumë modesti edhe unë jam një nga njerëzit që ka dhënë një farë ndihme që Adi Krasta të idhnojë qeverinë, dal vullnetar të tërheq mbrapsht gjithçka kemi shpifur në atë studio.
Kjo ka ardhur, se nuk i njihja të mirat e zgjedhjeve të 30 qershorit, aftësinë e kryetarëve të pastër akullore të bashkive, rritjen ekonomike që na dha falë kulturës së barit në bujqësi, përfshirja në administratë dhe qeveri të çunave problematikë, PPP-të, përndritja e ideve gjeopolitike të Batonit dhe djalkës diplomat…
Për të gjitha këto e shumë të tjera ndjehem fajtor, kam gabuar rëndë dhe kërkoj ndjesë publike.
Denoncoj Adi Krastën si njeri që e ka merituar masën ndëshkimore që mori qeveria për të dhe e ftoj të bëjë autokritikë të fortë e të thellë dhe të pranojë të punojë kokëulur vullnetar për Rilindjen, e cila po i sjell popullit gjithë këtë begati, siguri dhe mirëqenie.”- ishte mesazhi i plotë i Enkel Demit.
