Ministri i Jashtëm, Gent Cakaj, ka njoftuar se Shqipëria i është përgjigjur pozitivisht thirrjes së Kosovës, për bojkotimin e ceremonisë së çmimeve “Nobel” në Suedi.
Nëpërmjet një postimi në Facebook, ky i fundit ka urdhëruar ambasadorin shqiptar në Suedi, që të bojkotojë ceremoninë.
Cakaj shkruan, se justifikimi i mizorive të luftës gjatë shpërbërjes së Jugosllavisë, nuk duhet të shpërblehet.
“Duke qenë thellësisht të bindur se arsyetimi dhe lavdërimi i krimeve të luftës është pengesë për shpirtin e pajtimit që duhet të mbizotërojë në rajon, ne kemi urdhëruar Ambasadorin e Shqipërisë në Suedi që të bojkotojë ceremoninë solemne të ndarjes së Çmimit Nobel për Letërsi për Peter Handken. Çdo shpërblim i personaliteteve që kanë mohuar gjenocidin edhe nëpërmjet veprave të tyre letrare, vetëm forcon prirjet për t’iu shmangur përgjegjësive historike dhe relativizuar peshën e rëndë të krimeve të luftës, pastrimit etnik dhe gjenocidit. Ndaj, Shqipëria do të bojkotojë ceremoninë zyrtare të ndarjes së Çmimit Nobel për Letërsi. Përkushtimi ynë, ndërkaq, do të vazhdojë për promovimin e marrëdhënieve të mira fqinjësore bazuar në vlerat e patjetërsueshme të së vërtetës dhe në përputhje me kërkesat më të larta të drejtësisë”, shkruan Cakaj.
Peter Handke u shpall fitues i “Çmimit Nobel në Letërsi” për 2019-ën.
Vendimi i jurisë shkaktoi zemërimin e shumë shoqatave dhe intelektualëve në botë, për shkak se Handke është një mbështetës i gjenocidit serb dhe Millosheviçit.
/Gazeta Reforma
