Kryeministri grek Mitsotakis ka kërcënuar disa herë se nëse kryebashkiaku i Himarës, Fredi Beleri nuk lejohet të bëjë betimin qoftë edhe nga burgu, mund të kemi implikime të rënda sa i takon BE-së.
Më duhet t’ju them se më shqetëson veçanërisht fakti jo vetëm i burgosjes së kryebashkiakut të zgjedhur të Himarës, por mbi të gjitha fakti që edhe sot Shqipëria refuzon të bëjë të vetëkuptueshmen, për t’i dhënë atij mundësinë edhe nga burgu për t’u betuar si kryetar bashkie. Është një mesazh që unë ia kam përcjellë në çdo mënyrë udhëheqjes së Shqipërisë.
“Kjo që po them i referohet një vendimi administrativ, unë nuk ndërhyj në gjykimin e drejtësisë shqiptare, do të ishte shumë e vështirë dhe e pahijshme nga ana ime ta bëja këtë, por heqja e mundësisë së Fredi Belerit për t’u betuar si kryetar bashkie, edhe me statusin e personit të paraburgosur, përbën sipas mendimit tonë, shkelje të qartë të rregullave të shtetit ligjor, krijon probleme të mëdha në marrëdhëniet tona dypalëshe dhe mendoj se do të ketë pasoja më të gjera nëse kjo politikë vazhdon gjatë përpjekjeve të Shqipërisë për t’iu afruar familjes evropiane.”- tha ai ndër të tjera.
Ndaj Rama po synon të lobojë që Greqia të heqë bllokadën ndaj qeverisë së tij. Ai i frikësohet një bllokade serioze që mund t’i sjellë Athina, “nder” të cilin duket se do ta paguajë shtrenjtë.
Pritet që Rama të përdorë në SHBA “asin” e tij nën mëngë, priftin Alexander Karloutsos, priftin grek që pretendonte se kishte rrënjë shqiptare dhe i kryente shumë “ndere” kryeministrit tonë.
Pasi Father Alex e ndihmoi të takonte lobistë që do ta çonin deri tek Biden, që ta përdorte si propagandë për zgjedhjet (kur udhëtonte në Amerikë në kohë pandemie, me justifikimin e vaksinave), toka e Qeparosë mbeti një premtim që s’u përmbush për priftin.
Ishte pikërisht Father Alex, më i famshmi për organizimin e fundraisers (me fonde të dyshimta korrupsioni), që e ndihmoi Ramën të takonte edhe ceo-n e Pfizer, Albert Bourla. Lidhjet e Alex ishin të forta, pasi prifti kishte pagëzuar edhe fëmijët e ceo-s, të cilin e takoi me Ramën.
Pikërisht që kryeministrit i ka ardhur “laku në fyt” prej qeverisë greke, mund të kryejë manovra që mund t’i kushtojnë Shqipërisë tokën e Qeparosë për heqjen e bllokadës.
Toka e Qeparosë, e synuar më herët prej djalit të priftit Michalis Karloutsos, për një nga projektet e tij të mëdha, mund të jetë tashmë “kurbani” që do të shpëtojë Ramën e do t’i vijë në ndihmë Karloutsos, që po has probleme me investimin e fundit
Michalis, ndërmjetës midis Hard Rock dhe palës greke për krijimin e projektit kazino në Ellinikon, ka shkaktuar pakënaqësi tek banka, investitorët dhe qeveria ndërsa projekti ka mbetur në pikëpyetje, ndaj toka e Qeparosë është “dora” që i duhet atij.
Mbetet për t’u parë nëse Rama do t’i shpëtojë bllokadës së Athinës dhe bllokimit të integrimit në BE, duke i dhuruar Qeparonë e premtuar dikur, eksponentit të fortë të lobit grek në SHBA, priftit Alex, të cilin e takon rregullisht që prej vitit 2020.
/Gazeta Reforma
