“Kur e këndova për herë të parë këngën më solli në mendje fëmijërinë time. Doja të këndoja, “bastard, ti nuk më ke bërë asgjë”. Këto fjalë të Ermal Metës në intervistën për “Rai 1”, nxitën mediat shqiptare të aludonin se po ia kushtonte babait të tij.
Këngëtari shqiptar, që fitoi “Sanremo”-n, ka treguar më herët se ka kaluar një fëmijëri të vështirë, për shkak të atit të dhunshëm, por duket se kjo është një histori e hedhur pas krahëve prej tij.
Ermal Meta vendosi të shkruante në shqip në “Facebook”, për t’u dhënë një mesazh të gjitha mediave vendase:
“Mesazh për të gjithë gazetarët shqiptarë:
Mos spekuloni mbi jetën time, ju nuk dini asgjë nga jeta ime. Kur në atë intervistë përdora fjalën “bastard” nuk thash asnjë emër. Mos e shtoni ju atë emër sepse gaboni rëndë jo vetëm me mua por edhe me familjen e personit për të cilin po shkruani ose po flisni.
Kënga që fitoi festivalin e Sanremos është kundër terrorizmit, asgjë më shumë. Shpresoj mos te lexoj më gjëra të tilla”.
Kënga (“Non mi avete fatto niente”) e interpretuar me Fabrizio Moro-n, është një himn kundër terrorizmit dhe në tekstin e saj përfshihen shumë raste të ndodhura në të shkuarën, por që lajtmotiv mbetet vargu “Nuk më keni bërë asgjë”, që përbën edhe titullin e saj.
Burimi: Facebook
