Aktori i humorit, Besart Kallaku, prej disa muajsh ka qenë figura kryesore e një ndër kompanive të karburanteve në Shqipëri. Me falimentimin e saj aktori është bërë pjesë e sulmeve ku akuzohet se është pjesë e skemës së mashtrimit të bërë nga kjo kompani.
Përmes një skeme gati piramidale shitjesh tollonash nafte dhe benzine me çmime deri në 30% më të ulëta se tregu, kjo kompani tërhoqi mjaft klientë të cilët parapaguanin karburantin, por me falimentimin e saj blerësit e këtyre tollonave nuk po dinë ku të drejtohen.
Pas akuzave që i janë bërë aktorit Besart Kallaku, i cili ishte imazhi i reklamave të kësaj kompanie, ai ka zgjedhur të reagojë nëpërmjet një postimi në Instagram ku thotë se dhe ai është pjesë e personave të dëmtuar nga kjo skemë mashtrimi dhe do të ndjekë rrugën ligjore në këtë rast.
