Pas 10 vitesh punë në emisionin “Klubi i Mëngjesit”, Blendi Salaj u ka thënë sot lamtumirë kolegëve të tij, për të përmbyllur kështu një dekadë në këtë program, dhe për të hapur një dritare të re në karrierën e tij.
Përmes një postimi në Instagram, gazetari falënderoi kolegët dhe e quajti punën e tij në televizion, “udhëtim i paharrueshëm që ma shenjon karrierën dhe jetën”.
Por sipas Blendit, mbyllja e këtij cikli është edhe një fillim i ri. Ai është bërë pjesë e televizionit më të ri “A2 CNN”, për të prezantuar emisionin e mëngjesit “Dita Jonë”.
“Bashkë do takohemi mëngjeseve në ekranin e @a2cnn dhe shumë shpejt sërish në valët e radios me një tjetër projekt. 🙂 Ju uroj vit të ri të mbarë, shëndet dhe gëzim. Sinqerisht, ❤️ Blendi”, e përmbyll fjalën gazetari.
