Rania Zeriri, ylli 39-vjeçar holandez, e njohur edhe në Gjermani, u gjet në Mercogliano, në zonën e Avellino-s, ku jeton si e pastrehë. Administrata komunale është mobilizuar për ta ndihmuar, ndërsa kryetari i bashkisë, Vittorio D’Alessio, shkruan në Facebook se këngëtarja “është e sigurt”.
“Po mundohemi të ndihmojmë këngëtaren e re holandeze në vështirësi”, tha kryebashkiaku pak orë më parë, në një postim të shoqëruar me një foto ku shihet gruaja e ulur, me gjërat e saj në disa çanta, në anë të rrugës.
Kryebashkiaku shpjegoi se ai është në kontakt me ambasadën holandeze. Ndërkohë, psikologia Michela Bortugno, nga shërbimet sociale po flet me Ranian.
Rania Zeriri ka lindur në Enschede, Holandë, më 6 janar 1986, nga një baba algjerian dhe një nënë holandeze. Ajo lindi me problem në kordat vokale që e vështirësoi arritjen e disa notave më të larta, por ia bëri zërin më të hollë. Pasi filloi të studionte muzikë, Rania Zeriri arriti popullaritet në vitin 2008, kur ishte në mesin e 5 finalistëve të Deutschland sucht den Superstar, versioni gjerman i talent show Idol. Në të njëjtin vit ajo publikoi këngën “Crying Undercover”, një këngë që u bë shumë e njohur në Gjermani dhe Holandë.
Historia e saj ngjason me atë të ikonës së muzikës shqiptare, Parashqevi Simakut, e cila disa muaj më parë u gjet në një stacion treni në SHBA.
