Këngëtarja e njohur shqiptare, Parashqevi Simaku, ka shprehur dëshirën për të gjetur vajzën që i dhuroi një çantë me ndihma, në një moment kur ajo ndodhej në vështirësi në SHBA.
Ngjarja u bë fillimisht publike përmes programit “On your side” në kanalin amerikan ABC7, ku Simaku u shfaq duke marrë një çantë ndihme gjatë një aksioni bamirësie për personat e pastrehë.
Gazetarja Nina Pineda e ABC7, në një dalje të fundit televizive, zbuloi kërkesën e veçantë të këngëtares shqiptare. “Parashqevia na tha se ndihej më mirë dhe komuniteti vazhdon ta mbështesë. Ajo kërkoi ndihmë për të gjetur vajzën e vogël që shkroi shënimin në çantë, e cila quhet Ella,” tha Pineda.
Mesazhi prekës në çantë thoshte: “Pavarësisht sa të vështira bëhen gjërat, mbaj mend se ka shpresë dhe njerëz që janë aty për të të mbështetur në çdo hap të rrugëtimit.”
Videoja e momentit kur këngëtarja merr dhuratën u bë virale në rrjetet sociale, duke nxitur një valë mbështetjeje për ikonën e muzikës shqiptare.
