Vendi ynë pritet të përfshihet të martën nga kushte të paqëndrueshme atmosferike, duke sjellë një ditë me mot të vranët dhe reshje shiu në pjesën më të madhe të territorit. Sipas parashikimeve meteorologjike, reshjet do të nisin që në orët e para të 24-orëshit, me intensitet të ulët deri mesatar, ndërsa në zonat veriperëndimore dhe jugperëndimore pritet që reshjet të jenë më të dendura, herë pas here në formën e shtrëngatave dhe stuhive.
Gjatë gjithë ditës, vendi do të vijojë të jetë nën ndikimin e reshjeve të herëpashershme, të cilat në zonën perëndimore mund të arrijnë intensitet të lartë. Për zonat malore në verilindje dhe në Alpet Shqiptare, parashikohet që reshjet të shndërrohen në dëborë, kryesisht me intensitet të ulët.
Sa i përket erës, ajo do të fryjë me shpejtësi mesatare rreth 8 m/sek, por përgjatë vijës bregdetare dhe në momentet kur shtohen vranësirat, pritet të arrijë deri në 20 m/sek, duke krijuar kushte të vështira për zonat pranë detit. Si pasojë, valëzimi në det parashikohet të jetë i forcës 4 deri në 5 ballë.
Meteorologët këshillojnë qytetarët të tregojnë kujdes gjatë orëve me intensitet më të lartë reshjesh dhe të shmangin lëvizjet në zonat ku mund të shfaqen stuhitë e forta.
