Të martën, më 19 gusht, Shqipëria do të ndikohet nga kushte atmosferike relativisht të qëndrueshme. Sipas parashikimeve nga Shërbimi Meteorologjik Ushtarak, moti do të jetë kryesisht i kthjellët në pjesën më të madhe të territorit.
Gjatë mesditës dhe pasdites, në zonat kodrinore dhe malore do të shfaqen vranësira të herëpashershme, të cilat në disa raste do të shoqërohen me reshje të dobëta shiu, me karakter lokal. Në zonat më të thella malore, reshjet mund të jenë edhe në formën e shtrëngatave afatshkurtra, por të izoluara.
Era do të fryjë nga veriperëndimi në verilindje me intensitet të ulët deri mesatar, me shpejtësi 2 deri në 7 metra për sekondë. Përgjatë vijës bregdetare dhe në zonat luginore priten momente me erë më të fortë, që mund të arrijë deri në 8-10 m/s.
Sa i përket detit, ai do të jetë i qetë, me dallgëzim të ulët në forcën 1 deri në 2 ballë.
