Nëse i zbatojmë me rigorozitet masat e ndërmarra për të frenuar koronavirusin, atëherë kjo pandemi pritet të zhduket njëherë e mirë nga vendi ynë nga mesi i majit ose fillimi i qershorit.
Këtë deklaratë e ka bërë mjeku Ilir Allkja në një intervistë me skype për Fax News ku ka folur për situatën në spitalin e Infektivit, por edhe në rang vendi për shkak të koronavirusit.
“Personalisht besoj që mesi i majit ose fillimi i qershorit, me llogaritjet që kam bërë unë”, u shpreh mjeku (Video min 10).
Ai foli edhe për kufizimet që janë vendosur nga qeveria ndërsa shprehu disa rezerva në lidhje me oraret.
“Jam dakort me kufizimet dhe që njerëzit të mos dalin nga shtëpia, nuk isha dakort me oraret e shërbimeve tregtare, kam folur me kolegë nëpër botë dhe më kanë thënë se qëndrojnë të hapura, nuk mund të kesh një orar për të shkuar në farmaci pasi mund të jetë një çështje jetike”.
Numri i testimeve sipas tij duhet të jetë në përputhje me rekomandimet e Organizatës Botërore të Shëndetësisë dhe se nuk mund të bëhen shpikje.
“Ne nuk mund të bëjmë shpikje por të ndjekim përvbojën e vendeve të përparuara, jemi të detyruar të ndjekim me domosdo këshillat e OBSh. Ndoshta kursehen testimet se nuk ka shumë në dispozicion, nuk i di politikat, por ne nuk duhet të bëjmë dallime nga të tjerët, nuk ka vend për shpikje tonat por të ndjekim këshillat e OBSH-së”, tha Allkja.
