Organizata Botërore e Shëndetësisë paralajmëroi të mërkurën se vendet e pasura nuk mund të përdorin dozat përforcuese për t’i shpëtuar koronavirusit.
Ndërkohë, Franca u bë një nga vendet e para që do të vaksinojë fëmijët mbi pesë vjeç, ndërsa vendet e tjera përpiqen të frenojnë rritjen e infektimeve me Omicron.
Nga ana tjetër, Kina e përballoi shpërthimin e fundit të infektimeve të virusit duke mbyllur një qytet të tërë.
Britania, e cila raportoi një rekord prej 106,000 rastesh të reja në 24 orë, miratoi vaksinën e Pfizer për fëmijët e moshës pesë vjeç e lart, pasi agjencitë rregullatore të shëndetësisë në Shtetet e Bashkuara autorizuan pilulën COVID-19 të Pfizer për pacientët mbi 12 vjeç që kanë rrezikshmëri të lartë.
“Asnjë vend nuk mund të përshpejtojë daljen e tij nga pandemia,” tha të mërkurën Sekretari i Përgjithshëm i Organizatës Botërore të Shëndetësisë, Tedros Adhanom Ghebreyesus.
“Programet e përgjithshme të dozave përforcuese ka të ngjarë ta zgjasin pandeminë COVID-19, në vend që t’i japin fund asaj, duke devijuar furnizimin me vaksina për te vendet që tashmë kanë nivele të larta të mbulimit të vaksinimit. Kjo i jep virusit më shumë mundësi për t’u përhapur dhe për të pësuar mutacione.”
Dozë e tretë e vaksinës nuk duhet parë as si “carte blanche”, shtoi ai. “Dozat përforcuese nuk mund të shihen si një biletë për të vazhduar me festat e planifikuara të fundvitit.”
Festimet e pakufizuara të fundvitit mund të bëhen burimi kryesor i infeksioneve të reja, paralajmëroi OBSH.
Kërcënimi i variantit me shumë mutacione Omicron po bëhet gjithmonë e më i madh gjatë festave të fundvitit, duke shtyrë shumë qeveri të vendosin kufizime të reja dhe t’u bëjnë thirrje qytetarëve që të vaksinohen.
Të dhënat e fundit tregojnë se Omicron nuk shkakton sëmundje më të rëndë se variantet e mëparshme, duke përfshirë Deltan, por teksa numri në rritje i infeksioneve kërcënon të kolapsojë sistemet shëndetësore, shkencëtarët paralajmërojnë se ai mund të shkaktojë akoma më shumë humbje jetësh.
Masat për vaksinimin e fëmijëve
Franca filloi të mërkurën vaksinimin e fëmijëve të moshës 5 deri në 11 vjeç, duke paralajmëruar se shifrat e infektimeve ditore mund të arrijnë në 100,000 deri në fund të vitit, një rritje e ndjeshme krahasuar me mesataren javore prej 54,000 rastesh ditore.
“Ka një gjë të sigurt,” tha Ministri francez i Shëndetësisë Olivier Veran. “Omicron është shumë ngjitës, ai do të përhapet dhe nuk do të kursejë asnjë vend.” Por vaksinat patën një efekt te ky variant, theksoi ai.
Britania miratoi vaksinën e Pfizer për fëmijët e moshës 5 deri në 11 vjeç, si dhe njoftoi se do të blinte miliona pilula COVID-19 dhe do të shkurtonte periudhën e izolimit për njerëzit e infektuar nga 10 në 7 ditë në rast të një testi negativ.
Ajo gjithashtu nënshkroi një marrëveshje për të blerë 4.25 milionë ngarkesa me ilaҫet antivirale ritonavir të Pfizer dhe molnupiravir të rivalit amerikan Merck/MSD, të cilat kanë rritur shpresën për trajtime të lehta në shtëpi.
Edhe Finlanda zbuloi planet për të zgjeruar programin e saj të vaksinimit te fëmijët nga 5 deri në 12 vjeç, një ditë pasi njoftoi se baret duhet të mbyllen në orën 21:00 të mbrëmjes së Krishtlindjes për të luftuar nivelet rekord të infeksionit COVID.
Administrata Amerikane e Ushqimit dhe Barnave (FDA) autorizoi ndërkohë pilulën Pfizer për njerëzit me rrezikshmëri të lartë të moshës mbi 12 vjeç, duke e quajtur këtë një moment të rëndësishëm dhe historik të pandemisë, që do t’i mundësojë miliona njerëzve të kenë akses në trajtimin e infektimit.
/The Times of Israel
