Kryeministri Edi Rama e ka cilësuar ‘absurd’ vendimin e Gjykatës Kushtetuese për pezullimin e vendimit për studentët e mjekësisë pasi sipas tij me këtë ligj nuk është shkelur asnjë e drejtë kushtetuese. Në Asamblesë e Zgjeruar të Partisë Socialiste në Tiranë që u mbajt ditën e djeshme, ai ka folur lidhur me ligjin për punën e detyruar të mjekëve të rinj, ndërsa paralajmëroi se praktika që u ndoq me studentët e mjekësisë do të zgjerohet në arsimin publik.
“Unë nuk i diskutoj vendimet e gjykatave, por edhe pezullimi që i bëri Kushtetuesja kërkesës absurde të studentëve është absurd. Është absurd dhe po e diskutoj sepse është pezullim. Shkolla e magjistraturës e ka kusht, mund të hysh por nuk merr dot diplomën po nuk punove 5 vjet si magjistrat. Fakti është që nuk është shkelur asnjë e drejtë kushtetuese dhe nuk është vënë në diskutim. Ne këtë sistem do ta zgjerojmë. Në Arsimin publik që e kemi shumë të favorshëm dhe jo aq larg kërkesave të Europës, do ta zgjerojmë. Ose është varianti tjetër që i kemi dhënë studentëve, do të ikësh që nesër dhe t’i kthesh kurrizin këtij vendi? Do paguash një tarifë tjetër, do paguash atë që kushton. Është më pak se në Gjermani por prapë do paguash. Nëse do këtë tarifën tjetër do rrish maksimumi 5 vite. Dhe 5 vite është për ata që hyjnë në vit të parë. Këta që i kapi rrugës 2-3 vjet do rrinë”, ka thënë ai.
