Një ngjarje e rëndë është regjistruar pasditen e kësaj të enjte në zonën e Rinasit, rreth 300 metra larg mbikalimit.
Sipas informacioneve paraprake, një person ka përplasur katër automjete dhe më pas ka dalë nga mjeti duke mbajtur në dorë një hanxhar, me të cilin ka kërcënuar dhe ndjekur kalimtarët e rastit.
Situata është neutralizuar falë ndërhyrjes së menjëhershme të tre efektivëve të Forcave të Armatosura, të cilët ndodheshin rastësisht në vendngjarje. Ata kanë arritur ta vënë në kontroll autorin, duke e shtrirë në tokë, duke i marrë armën dhe duke i vendosur prangat, deri në mbërritjen e Policisë.
Identiteti i personit nuk është bërë ende i ditur, ndërsa pritet një reagim zyrtar nga autoritetet për më shumë detaje mbi ngjarjen.
Ngjarja u bë publike fillimisht nga një qytetar për JOQ, i cili raportoi se autori, pasi kishte përplasur disa automjete, kishte dalë në rrugë me hanxhar në dorë dhe kishte nisur të ndiqte njerëzit përreth, duke krijuar panik në zonë.
“Joq pershendetje! Kam nje rast qe dua ta publikoni urgjent ju lutem! Para 20 min ne rrugen e rinasit ishte nje person me nje hanxhar ne dor qe kishte perplasur disa automjete dhe kercenonte kalimtaret e rastit me hanxhar. Aty rastesisht ishin 3 efektiva te forcabe te armatosura me saktesisht me sa morem vesh ishin efektiv te forcave speciale te marines detare grupit te bordingut qe nderhyn dhe e neutralizuan duke i hequr hanxharin qe mbante ne dor dhe i vun prangat dhe e mbajten te neutralizuar deri sa erdhen policia qe ben shoqerimin e tij. Ishte diku 300 m larg mbikalimit te rinasit. Ata cunat e ushtris ishin rastesisht aty. Ai kishte perplasur 4 automjete tjera dhe kishte dal me hanxhar ne dor dhe ndiqte njerezit e rastesishem aty”, thuhet në denoncimin e bërë nga qytetari pranë redaksisë së JOQ. (MESAZHI I PA REDAKTUAR)
Fatmirësisht, ndërhyrja në kohë e efektivëve shmangu përshkallëzimin e mëtejshëm të situatës dhe parandaloi pasoja më të rënda.
