Akti normativ i qeverisë për ndalimin e muikës pas orës 20:00, duket se nuk është i vlefshëm për të gjithë.
Kjo pasi, në një kohë që policia dhe task forca vijon me gjobitjen e bizneseve familjare dhe lokaleve të dasmave, resorteve të mëdha u kanë lënë dorë të lirë për të vepruar.
Shembulli më i fundit na vjen nga Mali i Robit, ku “Prestige Resort” ka vijuar me muzikë dhe party deri pas mesnate. Dhe më interesant është fakti që policia kaloi pranë dhe nuk bëri asgjë.
Një automjet policie që shfaqet në pamjet e siguruara nga iconstyle.al, kaloi pranë resortit para orës 2:00 të mëngjesit dhe nuk ndërmori asnjë veprim për të ndaluar shkeljen e ligjit. I njëjti automjet shihet teksa kalon sërish pak më vonë duke i rënë njëherë sirenës sa për paralajmërim, për të vijuar më tej me patrullimin.
Përpos shkeljes së aktit normativ nga biznesi në fjalë, dhe shpërdorimit të detyrës nga ana e uniformave blu, ka pasur mjaft ankesa me telefonata që raportonin muzikën e lartë që i la pa gjumë banorët në këtë zonë. Dëshmitari rrëfen kështu ngjarjen për iconstyle.al:
“Policia kaloi para ores 2:00 dhe nuk beri gjë, e kaloi prapë pak më vonë. I ra njëherë sirenës e vazhdoi”.
Pra ky është shteti që kemi, gjoba miliona lekëshe për bizneset e vegjël dhe një të rënë të sirenës për të mëdhenjtë!
Ndërkohë që policia po vijon të merret me bizneset e vogla, të cilat po mundohen të ngrejnë sadopak kokën pas pandemisë, duke qenë se janë lënë në harresë nga qeveria, mbetet e pashpjegueshme sesi po lihen të lira këto resorte të mëdha.
Policia vijon të bëjë publike gjobat selektive në media si të ishin veprime heroike, vetëm për të treguar se aksioni vijon. Por nga ana tetër, nuk po bën asgjë ndaj këtyre bizneseve të mëdha që vijojnë aktivitetin e tyre sikur të mos kishte ndodhur asgjë!
“Iconstyle.al” denoncon publikisht këto raste për të cilat duhen marrë masa urgjente nga identifikimi i policisë që patrullonte në atë zonë, te ndëshkimi i biznesit për shkeljet që i disponojmë me zë dhe figurë.
Ne ju bëjmë thirrje të raportoni çdo shkelje të ligjit nga club-et e resortet e mëdha në jug, të cilat po ju shpëtojnë paq gjobave të policisë, nën hundën e këtyre të fundit.
Në fund të fundit, ligji është i barabartë për të gjithë!
