Të gjitha ato marka të cilat duan t’u bashkohen emrave të mëdhenj të modës, si Gucci apo Chanel në faqen zyrtare të Vogue Runway’s, janë të lira ta bëjnë, por me një tarifë goxha të majme.
T’i bashkohesh indeksit të dizajnuesve dhe markave të Vogue Runway është parë në industrinë e modës si një vulë legjitimiteti, që daton nga viti 2000.
E thënë ndryshe, deri dje jo çdokush prezantonte koleksionet e tij në Vogue Runway, dhe ata që ia dilnin, merreshin për të mirqenë si stilistë vërtet të talentuar dhe që i përmbushin standartet.
Por tani për 20,000 dollarë në vit dhe përmes një miratimi nga redaktori i Vogue, një stilist ose markë mund të publikojë imazhet e koleksionit të tij në website-n e Vogue Runway, sipas vendimit më të fundit të marrë nga media prestigjioze.
Vogue pretendon se aplikantët do të jenë subjekt i miratimit të redaktorit, por kjo ka bërë që të lindin dyshime rreth standartit të markave që do të paguajnë.
A do ta mbyllë njërin sy redaktori kur të marrë paratë në dorë?
Website tani ka 2,5 milionë vizitorë gjatë një jave mesatare të modës dhe aplikacioni i Vogue Runway është shkarkuar më shumë se 1.8 milionë herë.
Me gjithë këto shifra të gjithë druhen se Vogue do të shndërrohet në një biznes ose faqe reklamash aspak korrekte.
