Në shkurt të këtij viti qytetarë të shumtë shqiptarë kërkuan bojkotimin e kompanive celulare Vodafone, Albtelekom dhe Telekom Albania, pasi këto të fundit rritën me 200 lekë çmimet e të gjitha paketave mujore duke u justifikuar se klientët kërkojnë më shumë njësi komunikimi, vendim që u pezullua përkohësisht nga Autoriteti i Konkurrencës.
Ky i fundit zhvilloi një mbledhje të bordit dhe mori vendimin për pezullimin e tarifës me 200 lekë të vendosura nga kompanitë celulare dhe po ashtu nisi një hetim për shkeljen e konkurrencës në treg.
Si u mbyll hetimi pa pritur dhe pa kuptuar në gusht!
Mirëpo, kur pakënaqësitë ndaj kompanive celulare vijnë në rritje dhe ndërhyrja nga AKEP dhe AK është shumë e nevojshme, kjo e fundit merr një vendim aspak normal dhe të papranueshëm, duke mbyllur në heshtje hetimin më 6 gusht të 2020.
Autoriteti i Konkurrencës është mjaftuar vetëm me disa rekomandime për kompanitë celulare, pa marrë ndaj tyre asnjë vendim ndëshkues për vjedhjen e kryer haptazi.
Në vendimin “Për mbylljen e procedurës së hetimit paraprak në tregun me pakicë të shërbimeve celulare dhe miratimin e angazhimeve si të detyrueshme në formën e kushteve dhe detyrimeve për ndërmarrjet Vodafone Albania, Telekom Albania dhe Albtelecom” , 3 kompanive celulare iu kërkohet mos të kryejnë më kartele, të ofrojnë një gamë më të gjerë çmimesh, të përballueshme për tregun shqiptar, të jenë transparente etj.
Një sërë çështjesh janë në pritje të AK dhe enteve rregullatore
Mirëpo, teksa një hetim është mbyllur në kushte të dyshimta hetime të tjera duhet të kishin nisur tashmë.
Si një nga tregjet më abuzive në vendin tonë, ‘Iocnstyle.al’ prej kohësh po ndjek me shqetësim zhvillimet që ndodhin në sektorin e telekomunikacionit, ku kemi denoncuar disa nga shkeljet më flagrante.
Kështu, kur AK kërkon rritje te njësive të internetit, qyetarët ankohen çdo ditë se paketat e tyre më parë mbarohen se aktivizohen. Disa javë më parë pasqyruam denoncimet e qytetarëve që ankoheshin se si 6 GB mbarojnë brenda 30 minutave. (KLIKO)
Një problem jo më pak i rëndësishëm është edhe dështimi i mbulimit të territorit, kryesisht i zonave të largëta të vendit, ku kompanitë telefonike nuk kanë interesa të zhvillojnë infrastrukturën. (KLIKO)
Nga kjo e fundit, atyre ju lind nevoja që të aktivizojnë paketa Roaming ndonëse janë brenda vendit. Këto të fundit nga ana tjetër janë problem më vetë, pasi përveçse shiten me çmime shumë më të larta se vendet fqinje, apo seç është e përballueshme nga qytetarët shqiptarë, nuk funksionojnë.
Qytetarë të shumtë na kanë adresuar pafund shqetësime rreth faktit se kanë mbetur në baltë nëpër botë pikërisht prej këtyre paketave. (KLIKO)
Madje rasti më ekstrem është ai me Kosovën, që ndonëse pritet të hiqen fare tarifat Roaming, ato nuk funksionojnë. (KLIKO)
Verbëria e papranueshme e Autoritetit të Konkurrencës ndaj Anomalive!
Në mënyrë të qartë dhe në shumicë institucionet rregullatore të tregjeve dhe Autoriteti i Konkurrencës, që lidhet drejtpërdrejtë me çështjen, dhe që paguhen nga taksapaguesit shqiptarë për të mbrojtur interesat publike, me veprimet dhe mosveprimet e tyre i shërbejnë interesave të tilla me shenja të qarta subjektivizmi dhe korrupsioni.
Përveç telekomunikacionit, Autoriteti i Konkurrencës ka zgjedhur mos të reagojë dhe t’i shërbejë interesave të kundërta nga ato që i parashikon ligji, që nga sektorët financiarë, të sigurimeve, bankarë, karburanteve, apo edhe testeve të Covid-19 (KLIKO), që “Iconstyle.al” i ka denoncuar prej muajsh.
Sidomos në raste të tilla, ku vihet në lojë një çështje kaq e rëndësishme, është e papranueshme që Autoriteti i Konkurrencës nuk ka ndërmarrë masa ndaj një vjedhjeje të tillë dhe njëkohësisht nuk ka njoftuar publikun në zbatim të detyrimeve të tij ligjore kundër marrëveshjeve të ndaluara të dyshuara të tipit “kartel” nga biznese në tregje të rregulluara.
