Zyra e Organizatës Botërore të Shëndetit ka bërë një vlerësim për situatën në Shqipëri.
Përmes një njoftimi zyrtar në Facebook, OBSH vlerëson angazhimin e punonjësve të shëndetit si dhe përgëzon shqiptarët për bashkëpunimin.
Masat e ndërmarra nga qeveria për të frenuar Koronavirusin, janë sipas OBSH-së mjeti më i fuqishëm për të kapërcyer këtë krizë.
Gjtihashtu në njoftim thuhet se testimi për COVID-19 duhet të bazohet në faktorë klinikë dhe epidemiologjikë. Ata persona që janë simptomatike dhe kanë pasur kontakte me të infektuar, duhet të testohen sipas OBSH-së.
Njoftimi i plotë:
Në shpërthimin e tanishëm epidemik të COVID-19, Zyra e OBSh-së në Shqipëri dëshiron të shprehë vlerësimin dhe mirënjohjen ndaj punonjësve të Shëndetit në Shqipëri, për angazhimin dhe përkushtimin e tyre ndaj qytetarëve në këto kohë të vështira. OBSh-ja dëshiron gjithashtu të përgëzojë qytetarët shqiptarë për bashkëpunimin në zbatimin e masave të marra nga Qeveria për të siguruar distancimin shoqëror. Këto masa janë tanimë mjeti më i fuqishëm që, të gjithë bashkë, kemi për të kapërcyer këtë krizë. Zyra e OBSh-së në Shqipëri po punon duke u koordinuar ngushtësisht me Ministria e Shëndetësisë dhe Mbrojtjes Sociale për të siguruar që vendimet e marra të jenë në përputhje me rekomandimet e OBSh-së. Në këtë drejtim, ne duam të theksojmë se vendimi për t’u testuar për COVID-19 duhet të bazohet në faktorë klinikë dhe epidemiologjikë, dhe që janë të ndërlidhur me një vlerësim të mundësisë për t’u infektuar. Testimi PCR i kontakteve asimptomatike ose lehtësisht simptomatike mund të konsiderohet në vlerësimin e individëve që kanë pasur kontakt me një rast COVID-19. Protokollet e depistimit duhet të përshtaten me situatën lokale.
