Situata duket tejet alarmante në vendin tonë, ku çdo ditë vendosen rekorde të reja infektimesh nga Covid-19, e situata ka arritur pikën kulminante ditën e sotme, kur është raportuar numri më i lartë i viktimave dhe rasteve të reja.
Ministria e Shëndetësisë dhe Mbrojtjes Sociale ka bërë me dije se në 24 orët e fundit në vend kanë rezultuar pozitivë 836 qytetarë, teksa 15 qytetarë kanë humbur jetën.
Duke u nisur nga këto shifra mjeku Pëllumb Pipero ka kërkuar që të mbyllen baret lokalet dhe restorantet pasi sipas tij janë rrezik i madh për përhapjen e virusit.
I ftuar në News24, infeksionisti tha se nuk është për një karantinë të dytë por për respektim të masave.
“Së paku të mbyllen më herët. Nëse baret dhe restorantet nuk respektojnë protokollet e distancave, ato bare që nuk i respektojnë të mbyllen një orë e më parë. Nuk është koha për të dëfryer por për të pasur kujdes. Kam parë dhjetëra lokale plot, brezi i ri, lozin, dëfrejnë me një kafe rrinë 4 orë. Të respektohet protokolli. Duhet të merret një masë. Nuk jam për karantine të dytë apo një mbyllje të dytë. Nuk është ajo zgjidhja. Pjesë e zgjidhjes është kjo që nuk është pjesë e zgjedhjes. Duhet medoemos të frenojmë transmetimin e virusit. Mosha 16-17-vjeçare që vete në lokale nuk jeton vetëm, ka familje, shkon në shkollë. Duhet doemos që atje ku më së shumti qarkullon të frenohet. Përpara se të mendojmë bllokimin, kapacitetet e shtuara spitalore të respektojmë ato masa që janë të rëndësishme. E shoh të arsyeshme të ngre zërin sepse o sot o kurrë mund ta parandalojmë”, tha Pipero.
Ditën e djeshme u raportua se qeveria po mendon të mbyllë kopshtet pas datës 30 nëntor, teksa nuk dihet ende se çfarë do ndodhë me shkollat.
Masat e vendosura deri tani janë:
Ndalohet lëvizja e qytetarëve nga ora 22:00-06:00 në të gjithë vendin, me përjashtim të lëvizjes për motive pune, emergjenca shëndetësore apo nevoja të domosdoshme.
Ndalohen aktivitetet e bareve – restoranteve nga ora 22:00 – 06:00 (përveç shërbimit delivery. Ndërsa administrata duhet të punojë nga shtëpia gjatë kësaj kohe.
Maska e detyrueshme në çdo ambient përveç shtëpisë.
Ndalohen grumbullimet me më shumë se 10 persona në vende të hapura dhe të mbyllura.
Ndalohen mbledhjet partiake dhe tubimet.
Konferencat, ceremonitë e festave, ceremonitë martesore dhe organizimet përtej familjare të ceremonive mortore, deri në një urdhër të dytë.
