Pas incidentit me studentët e Fakultetit të Ekonomisë, një tjetër rast që ka ardhur në redaksinë e “iconstyle.al”, tregon qartë mungesën e sigurisë nëpër shkollat shqiptare.
Një incident është raportuar se ka ndodhur ditën e djeshme në “Albanian College” në Tiranë, ku një nxënës ka lënë një armë në një çantë.
Çanta u gjet e braktisur në ambientet e korridorit të shkollës, dhe më pas u identifikua se kujt i përket.
Shkolla ka raportuar te të gjithë prindërit për incidentin, duke u dërguar atyre një email mbrëmjen e djeshme.
Në email thuhet se është bërë përjashtimi i menjëhershëm i nxënësit dhe se rasti po hetohet nga Departamenti i Policisë së Tiranës.
Nuk e dimë sesa të sigurt mund të ndihen prindërit dhe fëmijët pas këtij incidenti, pasi një nënë e shqetësuar ka shkruar te “iconstyle.al”, duke raportuar për armën e gjetur.
“Shkolla ka dërguar këtë email te prindërit pa paraqitur një konkretizim të ngjarjes, por veçse duke i shtuar frikën nxënësve dhe prindërve për të shkuar në shkollë”,shkruan një nënë e shqetësuar.
“Iconstyle.al” kontaktoi personalisht me shkollën, por nuk u dha asnjë sqarim përveç atij të dërguar në email!
