Për herë të parë në një intervistë mjaft prekëse, ka folur një grua shqiptare nga Kosova që ka qenë një prej viktimave të dhunës seksuale gjatë luftës.
Vasfije Krasniqi-Goodman, e cila jeton në Teksas të Shteteve të Bashkuara, theu tabunë mbrëmjen e djeshme duke rrëfyer publikisht tmerrin e përjetuar kur është përdhunuar nga forcat policore serbe në vitin 1999.
Vasfija sot 36 vjeçe, ishte vetëm 16 vjeç kur përjetoi një prej torturave më të tmerrshme të jetës së saj.
Ajo ishte përdhunuar nga dy serbë: njëri prej tyre polic i regjimit të Slobodan Millosheviçit, në fshatin Babimovc të Vushtrrisë.
“Më 14 prill të vitit 1999, isha në oborr dhe hyra brenda t’i thoja nënës të hapte derën. Nuk e dinim nëse erdhën të na vrisnin apo të na bastisnin. Ai pyeti ku e kemi babain dhe vëllain. Nëna i tha që janë në Gjermani. Ai tha ‘jo, nuk janë në Gjermani, kanë shkuar në luftë’ dhe hyri brenda e më mori mua,” tregon Krasniqi-Goodman. “Më tha se do të shkojmë në polici për të dhënë deklaratë. Nuk doja të shkoja, por më kapi dhe më futi në makinë.”
Edhe pse 16-vjeçe, ajo e kishte kuptuar që diçka e keqe do t’i ndodhte, kur automjeti nuk po shkonte në drejtim të stacionit të Policisë në Vushtrri, por diku tjetër.
Krasniqi-Goodman e kuptoi se nuk po shkonte në komisariat kur makina mori kthesën e gabuar. Ndaluan në Babimovc, një fshat të populluar me serbë.
“Në atë moment thjesht doja të vdisja me një plumb, dhe asgjë tjetër. Doja të më vrisnin”, thotë ajo.
“Më detyroi të dilja nga makina. Më gjuante me kallama misri. Nisa të qaja, të ulërija, të bërtisja. Më detyroi të hyja sërish në makinë dhe aty më ndodhi ajo që s’e merr dot ndërmend. Dorën e majtë e kishte të lidhur dhe thoshte ‘do të paguash ç’ka bërë babai yt dhe vëllai jot’. Doja të më vriste, por jo, sepse ‘kështu vuan më shumë,’” tregon mes lotësh Krasniqi Goodman.
Por tmerri nuk përfundoi me kaq pasi ajo thotë se u dhunua seksualisht edhe nga një person i dytë i cili ishte veshur me rroba civile.
“Pastaj është kthyer në makinë dhe ka ardhur një tjetër; ai nuk ka qenë me rroba të policisë, por me rroba civile. Më ka dërguar në një shtëpi tjetër afër shitores së fshatit Babimovc. Kur është kthyer ky i vjetri prapë në makinë, ka kaluar një ushtar aty pranë. I kam thënë që unë dua vetëm të shkoj në shtëpi. Ai më ka thanë: ‘Mos trego ku ke qenë, thuaju në shtëpi se ke dhënë deklaratë në polici. Më thanë se nëse u tregon familjarëve do të të vrasim”, rrëfen Vasfije Krasniqi-Goodman.
Rrëfimin e plotë të Vasfije Krasniqi-Goodman mund ta ndiqni në videon e mëposhtme:
Burimi: Lajmi.net
