Noizy dhe MatoLale në verë të vitit të shkuar sollën këngën “Adrenalinë”, që rezultoi një super hit. Mirëpo më vonë marrëdhënia miqësore mes dy reperëve u kris dhe përplasjet mes tyre kanë qenë të shpeshta.
Së fundmi MatoLale ka publikuar një këngë, që hapur është një “diss” për Noizy-n. Kënga e MatoLale mban titullin “Resto” dhe mes rreshtave ai përmend mikun më të mirë të Noizy-t, Varrosin.
“Edhe Varrosin që me demek e ke si vëlla, edhe Varrosin e ke lon me jetu në shtëpi me qera”, shprehet MatoLale në këngë.
MatoLale e pranon se Noizy e ka mbështetur në fillimet e karrierës dhe thotë se e ka dashur si vëlla dhe nuk priste që të merrte “diss” prej tij. Ndër të tjera ai e akuzon Noizy-n si të pabesë dhe se ndihet i rrezikuar nga MatoLale si reper i ri.
Mirëpo kundërpërgjigja e Noizy-t për MatoLale nuk ka vonuar fare! Ai ka publikuar në Instagram disa biseda që ka bërë me MatoLalen në qershor të vitit të shkuar, 1 ditë para se të publikonin bashkëpunimin e tyre “Adrenalinë”.
Në bisedë Noizy shihet se i kërkon MatoLales që ta shtyjnë publikimin e këngës së tyre, sepse ky i fundit kishte një mikun e tij të shtruar në spital. Nga mesazhet Noizy shihet se i ka kërkuar MatoLales të respektojë shokun, ndërsa ai i thotë se nuk mund ta shtyjnë këngën.
“Shokun ta bon për spital dhe s’të plasi shumë… mendjen e kishe te kënga me Noizy-n. Të kam mësuar dhe për shoqnin se si t’i rrish korrekt, se ke qenë dhe je i pa pjek ende. Kam aq shumë materiale për ty sa që edhe vet do habitesh”, ka shkruar Noizy përkrah fotove të bisedave.
“Mos e harroni asnjë moment kë keni të bëni. Rrenat e juaja zgjasin 2 ditë, mbas kësaj hype që more nga emri im dhe ti do vdesësh do përfundosh te gjithë llumi… dhe ti e din mirë këtë se e ke thonë dhe vetë, se kush të del kundra ty (Noizy) përfundon tek të shumtit. Të kujtohet? Numëro ditët dhe shife si vdes emri yt në heshtje me pambuk. Shokun e kishe në spital t’u luftu me jetën… mendjen e kishe te kënga me Noizyn. Ndërkohë flet boti për besprem”, ka shkruar në një tjetër postim Noizy.
Mirëpo edhe përgjigja nga MatoLale nuk vonoi. Ai ka publikuar disa komente nga kënga e tij, në të cilat fansa të Noizy-t shprehen se ky i fundit është arrogant dhe i pabesë dhe se i largon talentet e rinj nga grupi i tij OTR.
Pas këtyre, Noizy duket se nuk ka qëndruar duarkryq dhe ka fshirë bashëkëpunimin me MatoLale, këngën e suksesshme “Adrenalinë”, e cila numëronte plot 17 milionë shikime në Youtube.
