As këtë të hënë nuk ka nisur transporti publik qytetas dhe ndërqytetas, për shkak të refuzimit të këtij sektori për të nisur punën me një kosto të lartë për t’u përballuar në kushtet e krizës nga pandemia.
Përfaqësuesit e transportit publik kërkojnë uljen e TVSH-së dhe heqjen e akcizës, por nuk kanë ende një marrëveshje me qeverinë.
Gjithashtu ata thonë se është kosto e shtuar për ta realizimi i protokollit të sigurisë në kuadër të masave për parandalimin e koronavirusit.
Fillimisht ishte parashikuar që transporti të rihapej në 15 qershor, por ministria e shtyu me një javë për shkak të rritjes së rasteve të reja. Kjo vonesë aktuale vjen pas refuzimit të Shoqatës së Transportit për të nisur punën në këto kushte.
Deri më tani, qeveria ka marrë dy vendime në lidhje me tranpostin:
-Njohja si shpenzim i zbritshëm të 100% të konsumit të naftës, nga 43% që ishte deri më sot, me një efekt prej rreth 7 milionë dollarësh në buxhetin e shtetit;
-Heqja e të gjitha taksave dhe tarifave vendore për subjektet e transportit publik, deri në 31 dhjetor 2020.
Ndërkohë Shoqata e Transportit ka vendosur kusht plotësimin e këtyre kërkesave para se të nisë puna:
- Subvencionimi i të ardhurave të munguara për subjektet transportuese si pasojë e kufizimeve të protokollit të sigurisë.
- Heqja e akcizës dhe e taksave të karburantet, sic është zbatuar dhe në sektorë të tjerë të ekonomisë.
- Zbritja e TVSH-së në shitje nga 20% – 0% për vitin 2020 dhe rikthimin në nivelin 6% ne vijim si sektori i hoteleri turizmit.
- Rimbursimi në burim i kategorive të cilat përfitojnë transport publik falas.
