“Nuk më keni bërë asgjë”, duket se titulli i këngës iu përshtat edhe “betejës” së Ermal Metës në Festivalin e “Sanremo”-s, derisa në fund doli triumfues. Shqiptari Meta dhe Fabrizio Moro, të cilët konkurruan me këngën “Non mi avete fatto niente”, u shpallën mbrëmjen e djeshme fitues të festivalit në Itali.
Por për ta nuk ishte e lehtë rrugëtimi në këtë festivali, prej të cilit u pezulluan vetëm për pak orë. “Non mi avete fatto niente” rrezikoi t’i përjashtonte nga konkurrimi dy kantautorët, në bazë të akuzave për plagjiaturë të një kënge të prezantuar në “Sanremo”-n e të rinjve të vitit 2016, nën interpretimin e Ambra Calvanit dhe Gabriele De Pascalit.
Por gjatë konferencës për shtyp para mediave, Fabrizio Moro tha se këngën në fjalë e kishte shkruar po ai dhe risjellja e tekstit të saj nëpërmjet produksionit të sivjetshëm, ishte një rikthim i vlerave që nuk duhet të harrohen.
Më pas Ermal Meta vendosi se ishte koha për të folur:
“Tani është koha për të folur.
Kemi dëgjuar të flitet se kemi kopjuar këngën tonë të Sanremos dhe shkaku i këtyre fjalëve është një këngë e shkruar nga Andrea Febo (së bashku me Fabricion), e cila u prezantua rreth 3 vjet më parë, në Sanremo, e cila nuk u kualifikua dhe kurrë nuk u komercializua.
Fabricio, unë dhe Andrea kemi mbajtur një pjesë të asaj kënge për të mos sakrifikuar diçka të bukur (gjë që e kemi bërë të ditur në shumë intervista) dhe të tre kemi shkruar një këngë të re me një kuptim tërësisht ndryshe. Plagjiaturë do të thotë të kopjosh, por kjo është absolutisht qesharake duke marrë në konsideratë se Andrea Febo ka shkruar me mua dhe Fabricion këngën “Non mi avete fatto niente”.
Pas vlerësimeve të bëra, edhe “Rai” doli në përfundimin se kënga mund të vazhdonte garën, nga e cila dy artistët dolën triumfues. Ndërkohë që në vendin e dytë u pozicionua grupi “Lo stato Socciale” dhe në të tretin këngëtarja Analisa.
“Ja dedikoj këtë çmim shtëpisë sime diskografike, që besoi te unë kur askush tjetër nuk besonte”, tha Ermal Meta, pasi mori trofeun.
Kënga është një himn kundër terrorizmit dhe në tekstin e saj përfshihen shumë raste të ndodhura në të shkuarën, por që lajtmotiv mbetet vargu “Nuk më keni bërë asgjë”, që përbën edhe titullin e saj./iconstyle.al
