Tashmë nuk keni pse lëvizni nga shtëpia apo vendi ku ndodheni për të gjetur artikuj shkencorë, gjithçka që ju duhet është një kompjuter dhe internet.
Qeveria shqiptare prezantoi sot bibliotekën dixhitale, në të cilën janë përfshirë 193 mijë libra akademikë, mbi 50 mijë revista shkencore, mbi 200 milionë lajme shkencore, si dhe 30 paketa për mësimin e gjuhëve të huaj.
Këto materiale jo vetëm që mund t’i lexoni online, por edhe mund t’i shkarkoni.
Ministrja e Arsimit, Besa Shahini, prezantoi sot procedurën e aksesimit të studentëve dhe pedagogëve në bibliotekën online, ndërsa theksoi se ky investim do të rrisë cilësinë e kërkimit shkencor në të gjitha universitetet e vendit.
Aksesimi në portalin “ulibrary.rash.al” është shumë i thjeshtë, mjafton që të krijoni një llogari dhe mund të hyni sa herë që dëshironi përmes e-mail-it dhe fjalëkalimit.
