Capital T është padyshim një nga reperët më të suksesshëm në vend dhe me të drejtë ai synon që të kapë së shpejti edhe tregun ndërkombëtar të muzikës. Në një intervistë të dhënë ditën e sotme për emisionin radiofonik “Pardon my french”, reperi zbuloi se është në bashkëbisedim për një projekt ndërkombëtar. Capital T tregoi se gjatë udhëtimit të tij në SHBA para disa javësh ka zhvilluar disa takime me producentë të ndryshëm, mes të cilëve edhe me producentin e Pop Smoke.
“Kur isha me pushime në New York kam kontaktuar me njerëz për punë. Kam punuar me disa producentë që janë të klasit botëror, me producentin e Pop Smoke”, tha ai.
Kur u pyet nëse mund të kemi në të ardhmen një bashkëpunim ndërkombëtar, Capital T e pohoi këtë gjë, por tha se do të presë momentin e duhur për të lançuar një projekt të tillë.
“Po, janë biseda për bashkëpunim ndërkombëtar. Doja të thoja se kam prodhuar shumë, por kam vendosur mos të lançojë shumë sepse këngët nuk po e marrin vëmendjen e duhur! Vetëm po pres momentin e caktuar!”, u shpreh reperi.
Ndër të tjera Capital T la të kuptohet se mund të përfshihet edhe në botën e kinematografisë shumë shpejt. Reperi para pak ditësh publikoi këngën “Rrushe”, që do të jetë kolonë zanore e serialit me po të njëjtin titull. Në intervistën për “Pardon my french” Capital T tha se ka pasur bisedime që ai të bëhet pjesë e serailit edhe si aktor.
“Kemi folur, e kemi diskutuar me ekipin, por akoma nuk është vendosur. Seriali akoma nuk ka përfunduar kështu që ka mundësi!”, tregoi reperi.
