Kanë kaluar 6 muaj nga vrasja e të riut Klodian Rasha dhe vetëm sot janë publikuar pamjet e rënda të ekzekutimit të tij nga ish-polici, Nevaldo Hajdaraj. “Top Channel” ka siguruar pamjet nga kamerat e sigurisë, që tregojnë se e gjithë ngjarja ka ndodhur në vetëm pak sekonda.
Fillimisht, Klodian Rasha duket se ndiqet nga pas me vrap nga Nevlado Hajdaraj. Ky i fundit më pas tenton ta kapë Klodian Rashën, por ai vrapon dhe ish-polici rrëzohet në tokë. Siç është i shtrirë ai qëllon me armë pas shpine Klodian Rashën dhe më pas ngrihet dhe e ndjek sërish nga mbrapa. Rasha ecën më pas 2-3 hapa dhe rrëzohet pranë rrugicës së shtëpisë së tij. Më vonë shihet që i afrohet dhe polici, i cili komunikon në radio, ndërsa Klodian Rasha jep shpirt për pak sekonda.
Siç duket edhe nga pamjet që tregojnë gjithçka, mes ish-policit dhe të ndjerit nuk ka pasur asnjë lloj përleshje siç u raportua fillimisht në disa media. Gjithashtu kuptohet qartë se Klodian Rasha nuk ka pasur as armë, siç u pretendua dhe nuk ka rrezikuar jetën askujt. E gjithë ngjarja ka ndodhur për asnjë arsye dhe Klodiani është personi më i pafajshëm në gjithë këtë histori.
Po tani çfarë do të ndodhë me mediat që thanë se Klodiani ishte me precedent penalë, apo që kishte probleme mendore, për të justifikuar aktin ekstrem të ish-policit? Klodian Rasha është vetëm vetëm viktimë e shtetit policor, që mendon se ka të drejtë edhe mbi jetën e njerëzve.
Ndërkohë prokuroria e Tiranës ka kërkuar ditën e sotme 20 vite burg për efektivin Nevaldo Hajdarajn. Duke pasur parasysh gjykimin e shkurtuar, i cili është pranuar, efektivit të policisë do ti ulet 1/3 e dënimit, duke marrë një dënim 13 vite e 4 muaj burg, në rast se pretenca do të pranohet nga Gjykata. Sipas prokurorisë vrasja është kryer me dashje dhe do të ishte e pafalshme nëse jetën e marrë padrejtësisht të një njeriu do e vlerësonim me një dënim prej vetëm 13 vitesh e 4 muaj burg.
