Nuk ka festë në qendër të qytetit! Ja si do të organizohet Viti i Ri në Tiranë
Prej ditës së enjte në gjithë Shqipërinë ndalohet çdo lëvizje nga ora 20:30-06:00. Fasha e re orare u vendos pas një propozimi të Komitetit Teknik të Ekspertëve që vlerëson situatën epidemiologjike në vend javë pas jave.
“Kemi vendosur kufizimin e lëvizjes nga ora 20:30 deri në 06:00, nga 24 dhjetori deri në 4 janar. Përjashtim bëjnë ata që duhet të lëvizin për arsye shëndetësore apo pune. Nga 5 janari rikthehet ora 22.00 e ndalim-qarkullimit. Edhe aktiviteti i bareve dhe restoranteve do të kufizohet në këtë fashë orare. Do të jetë e detyrueshme karantina 14 ditore nga udhëtarët që vijnë nga Anglia”, deklaraoi mnistrja e Shëndetësisë Ogerta Manastirliu në fillim të kësaj jave.
Mirëpo shumë kanë pyetur çfarë do të ndodhë këtë në natën e ndrrimit të viteve, a do të ketë festime si vitet e shkuara në qendër të kryeqytetit? Sigurisht që festë nuk mund të ketë në këtë kohë pandemie, duke qenë se as grumbullimet nuk lejohen me më shumë se 10 veta.
Por kryetari i bashkisë, Erion Veliaj, është shprehur sot në “News 24” se spektakli i fishekzjarreve do të zhvendoset nga qendra drejt lagjeve të qytetit.
“Të gjithë e kuptuam edhe vjet pas tërmetit. Na vjen një fatkeqësi po jeta vijon për hir të fëmijëve. Kemi bërë një propozim festa do shkojë te njerëzit. Do kemi 11 vende publike, ku do të kemi një spektakël fishekazjarresh. Cdo kush do ketë ndjesinë e festës, do shpërndahet në lagjet e Tiranës. Në mesnatë kur hidhen fishekzjarret cdo kush do e shijojë nga ballkoni i vet”, u shpreh Veliaj.
Ai tha se në fundvit do të ketë autorizim për të lëvizur vetëm teknika, që do të merret me dekorin dhe festimet.
