Ndërkohë që kanë kaluar katër ditë nga krimi i dyfishtë në kryeqytet, ku një 31-vjeçar vrau me armë zjarri një 19-vjeçare, Shërbimi për Çështjet e Brendshme dhe Ankesat ka nisur verifikimin e të gjithë punonjësve të policisë të cilët kanë trajtuar çështjen.
Vrajsa e Xhuljeta Çunit, nga Xhaferr Mata duket se ishte një ngjarje e paralajmëruar duke qenë se 19-vjeçarja e kishte denoncuar në polici të riun disa herë. Ajo e kishte denoncuar Xhaferrin në Komisariatin nr.3 për përndjekje, por sipas familjarëve të saj policia nuk mori asnjë masë.
Gjitashtu është mësuar se edhe Xhaferri e kishte denoncuar 19-vjeçaren për mashtrim, me pretendimin se i kishte marrë një sasi parash borxh dhe nuk ia kthente.
Nisur nga këto të dhëna, Shërbimi për Çështjet e Brendshme dhe Ankesat ka nisur verifikimet për rrethanat e rastit, si dhe janë duke intervistuar gjithë punonjësit e policisë që kanë trajtuar çështjen. Në përfundim të këtij hetimi administrativ pritet që të ketë edhe një vendim për personat përgjegjës.
Burimi: Balkanweb
