Rudina Magjistari u detyrua ditën e sotme ta drejtonte programin e saj të pasdites “Rudina” nga shtëpia për shkak të infektimit me Covid-19. Moderatorja tha se nuk e ka bërë ende tamponin, po të gjitha shenjat e çojnë drejt mendimit se është infektur tashmë. Përveç kësaj ajo tregoi se bashkëshorti i saj ka rezultuar pozitiv, kështu që shanset janë të larta që edhe ajo të jetë prekur.
“Jam në një kënd këtu të improvizuar për të bërë një lidhje me ju drejtpërdrejt nëpërmjet Skype pasi e kisha të pamundur që sot të vija në studio. Pse do thoni ju, e nuk ka arsye tjetër përveç Covidit. Mesa duket ishte momenti për ta pasur unë radhën për të kaluar Covidin.
Në fakt me thënë të drejtën tamponin nuk e kam bërë ende, por simptomat janë bërë shumë të qarta, për më tepër që në familje, bashkëshorti im dje ka rezultuar me tampon me Covid kështu që duke presupozuar që mund ta kem dhe unë preferova të marr menjëherë masat, të izolohem dhe ndërkohë në ditët në vijim të bëj tamponin. Sigurisht që kam filluar mjekimin me mjekun infeksionit Gentian Stroni, kam qenë gjatë gjithë kohës në kontakt me të dhe kam rastin ta falenderoj dhe përshëndes sepse ka qenë gjithmonë i gatshëm për të më ndihmuar me këshillat dhe sugjerimet e tij”, tregoi moderatorja.
Ajo tha se për sa kohë ajo do të qëndrojë e izoluar lidhjet me Skype do të jenë të shpeshta, por do të transmetohen edhe emisione të cilat ajo i ka xhiruar para se të infektohej.
