Vëllai i Liridona Ademaj-Murseli, Leondard Ademaj ka folur pas seancës dëgjimore që është mbajtur sot në Gjykatën Themelore në Prishtinë.
“Liridona u vra në mënyrën më mizore dhe makabre që mund të jetë. Ishte grua, motër dhe nënën e fuqishme dhe doli të jetë heroinë dhe për fëmijët e saj. Ne po e përmbajmë veten sepse ajo nuk donte asnjëherë të na shihte në këtë gjendje.”
Vëllai i të ndjerës shtoi se në ditën tragjike i kishte kërkuar motrës që të rrinte në shtëpinë e tyre, por ajo vendosi të shkonte me bashkëshortin.
“Pasi ka arritur në Prishtinë, ka folur me babin dhe e i ka treguar se po shkojnë me ngrënë darkë. Unë isha në punë dhe më telefonoi gruaja më tha që e kanë vrarë Liridonën. Gjendja në shtëpi ka qenë shumë keq. Nuk doja ta besoja që Liridona ka vdekur.”
Leonardi theksoi se nuk mundet ta imagjinojë se në çfarë gjendje ka qenë motra e tij kur e ka pa burrin duke ikur nga makina me dy fëmijët. Ai shtoi se të vegjlit nuk e kanë kuptuar ende se iu ka vdekur nëna
“Nuk ka pasur ditë bese, ne besojmë në drejtësinë e Kosovës. Me fëmijët kemi pasur kontakt, ata janë mirë. Janë duke u përkujdesur prindërit e Naimit”.
Ademaj shtoi se shpreson që motra e tij është rasti i fundit që një grua vritet. Ai bëri të ditur se nuk i është lejuar hyrja sot në seancën dëgjimore.
