Ndërsa shumë mund të ishin skeptikë për karrierën e saj si aktore, Bleona Qereti tregon aftësitë në kinematografi në filmin më të fundi hollivudian “211”.
Filmi dramë/thriller ka në qendër të vëmendjes oficerin Mike Chandler dhe një civile të re, që gjenden të papërgatitur kur fati i vendos në një situatë të grabitjes së një banke.
Këngëtarja shqiptare njoftoi mbrëmjen e djeshme se filmi tashmë është në kinema, ndërsa publikoi një video nga momenti kur shfaqet ajo.
Bleona luan rolin e Christine, e cila duket se është një kliente, që po shijon kohën e kaluar në një lokal me miqtë e saj. E veshur me një kostum të bardhë, Qereti nis të thërrasë kur një grup njerëzish të maskuar dhe të armatosur, hapin zjarr brenda lokalit.
Në rolin kryesor luan aktori i mirënjohur Nicolas Cage dhe kolegia e tij në film është aktorja Sophie Skelton.
Një vit më parë, në prill të 2017-s Bleona njoftoi përmes kësaj fotografie se ishte përzgjedhur të bëhej pjesë e një filmi.
Burimi: Instagram/Iconstyle.al
