Marina Vjollca, e cila sapo ka përfunduar me sukses spektaklin “C’est la Vie”, u përfol ditën e djeshme se do të prezantojë reality-show-n e ri që do të nis së shpejti në “Tv Klan”, “Ferma”.
Por shumë shpejt ky lajm u hodh poshtë, pasi burime të tjera kanë treguar se këtë reality-show do ta prezantojë moderatorja tjetër e njohur, Alketa Vejsiu.
“Ferma” është një reality-show që do të mbledhë bashkë 12 VIP-a për të jetuar në një fermë. Ata do të duhet të bëjnë të gjitha punët që bën një fermer, të mjelin lopët, të rrisin pulat, të mbjellin fruta e perime.
Ardhja e këtij programi në Shqipëri është konfirmuar edhe nga Aleksandër Frangaj një muaj më parë gjatë një dokumentari.
Alketa Vejsiun pritet që ta shikojmë dhe në një emision tjetër, i cili do të startojë në muajin shkurt. “Në kurthin e Piter Pan” është emisioni për fëmijë që do të transmetohet të hënave, ndërsa reality-show “Ferma” përflitet se do të transmetohet të dielën mbrëma dhe është planifikuar që të startojë në muajin prill. Me sa duket Alketën do ta shohim në ekran dy net rresht.
