Pas një periudhe kaq të ngarkuar emocionalisht (kujto: tërmeti), edhe gjërat më të vogla duket se na rikthejnë pozitivitetin, siç mund të jetë një këngë e re e shumëpritur.
Vetëm pak ditë më parë, dy artistë që ne në “iconstyle.al” i kemi shumë përzemër, Gjiko dhe Nora Istrefi, bënë të ditur se do të hidhnin së shpejti një këngë të re.
Urraaa… Me shpresën se do mund të kishim një tjetër hit si “Gabime” për të hequr gjithë energjitë e këqija të këtij muaji (ne vdesim për këngë të kërcyeshme), pritëm e pritëm për pesë ditë derisa sa sot më në fund, kënga e titulluar “Anna” doli në “You Tube”.
Qetësi totale, zërin e kompjuterit në maksimum dhe veshët katër. Kënga nis me zërin e Norës: “Oh Anna, oh no no Anna, Dashnin tem ti mos e merr, e di që mundesh po s’osht fair”
Heshtje… sërish i njëjti varg që përsëritet.”Oh no no Nora!”-mendova dhe unë duke shpresuar që nuk ishte ajo që po më vinte ndërmend teksa dëgjoja pjesën tjetër të tekstit.
Praktikisht, kënga e re e Norës dhe e Gjikos i dedikohet një vajze joshëse, të cilës këngëtarja, Nora në këtë rast, i lutet që të mos ia marrë të dashurin edhe pse e ka mundësinë, sepse ai është gjithçka që ajo ka në jetë etj, etj.
Ju tingëllon si skenar e mbi të gjitha tekst i dëgjuar? Sigurisht, sepse për të njëjtën histori vetëm një vit më parë u akuzua edhe këngëtarja Era Rusi: Sepse edhe teksti i këngës së saj ishte identik me legjendaren “Jolene” të Dolly Parton.
“Jolene, Jolene, Jolene, Jolene
Të përgjërohem, të lutem mos e merr mashkullin tim
Jolene, Jolene, Jolene, Jolene
Të lutem mos e merr edhe pse ti mundesh”-janë vargjet e hitit të pavdekshëm të publikuar në vitin 1973, ku ndër të tjera artitja i thotë rivales:
“Unë e kuptoj se ti mund ta marrësh lehtësisht mashkullin tim,
por ti nuk e di çfarë është ai për mua, Jolene.
Ti mund të kesh cilindo mashkull që do,
por unë s’mund të dashuroj sërish,
Ai është i vetmi për mua Joleene.”
Ndërkohë pas vargjeve si gjithnjë mekëse të Gjikos që e thyen pak dramacitetim e këngës me rimat e tij, rifillojnë vargjet e Norës:
Se ai është krejt ça un kom,
është jeta ime.
Ti mundesh me pas kon don,
mendoje mirë.”
Përse vallë dy artistë shqiptarë që janë ndër më të suksesshmit në vend duhet të na i hidhnin në kosh pritshmëritë?! Por zhgënjimi u shtua edhe më shumë kur në You Tube pamë se autore e tekstit është një tjetër ndër të preferuarat tona, Era Istrefi. “Oh no no Era!”-mendova sërish duke mos arritur dot ta shpjegoj se si këta të tre vendosën ta publikonin këtë këngë.
Dolly është ende gjallë dreqi e mori! Dhe teksa nuk mund të mohojmë se Nora në klip duket thjesht yll, kënga na la për të dëshiruar. Ndaj deri në një këngë të re mes Gjikos e Norës, ne na keni akoma duke dëgjuar “Gabime” (rastësi e goditur).
