Ftesa e Goran Bregovic në festën e birrës në Korçë ka nxitur reagime të shumta në radhën e artistëve shqiptarë. Ndër personat që ka reaguar i revoltuar e madje ka kërcënuar se do të dhunojë këngëtarin serb është reperi i njohur, Noizy.
Përmes disa postimeve në Instagram ai u shpreh se Goran Bregovic nuk e njeh askush në Korçë dhe nuk ka pse të jetë i ftuar. Po ashtu ai shkruan se nëse nuk anulohet ftesa, ai do të nxisë fansat e tij, që ta godasin me shishe birre në kokë. Noizy u shpreh se në Shqipëri ndodhej edhe Dua Lipa, kështu që organizatorët e festivalit mund të ftonin atë nëse duan një artist me famë botërore.
“Bashkia e Korçës çne ai këngëtar për festën e birrës? Kush e njeh atë në Korçë? Anulojeni. ‘Cancel atë’ ose unë do nxis fansat. Ashtu siç nxiti ai në luftën e Kosovës. Shishe birra kokës. Çuna e dini vetë ju. Shishet plot jo bosh, se desh harrova. Dua Lipa është këtej. Plus e njeh gjithë bota… Thirreni atë”, shkruante Noizy në disa postime.
Pas kësaj, Noizy ka reaguar sërish duke treguar se ka një plan për bojkotimin e koncertit të artistit serb.
Në InstaStory, ai shpalos idenë e organizimit të një tjetër koncerti në të njëjtën ditë që Bregovic do të ngjitet në skenë.
“Duhet të bëjmë një koncert t’ia marrim gjithë fansat asaj festës, në të njëjtën ditë dhe të njëjtin orar”
“Duhet të mblidhemi të gjithë artistët e të gjitha zhanreve, të bëjmë një koncert tjetër paralel me atë që ka organizuar Bashkia e Korçës. Dhe iu bëj thirrje artistëve shqiptarë që kanë pranuar të shkojnë te koncerti ku është i ftuar ai, mirë është ta anulojnë atë, le të këndojë vetëm ai tri ditë rresht, pa fansa. S’kam asgjë kundër artistëve të asnjë shteti, por jam kundër një artisti që ka nxitur dhunë kundrejt vëllezërve dhe motrave tona, si ky rasti”, ka shkruar Noizy.
