Pas ndërprerjes për disa kohë të aplikimeve për kartat e identitetit dhe pasaportat, tashmë në kuadër të masave lehtësuese të shërbimeve, ka filluar puna për aplikimet e tyre.
Lajmin e ka bërë të ditur ministri Lleshaj ku tregon me detaje për procesin e aplikimit dhe masat që duhet të dinë qytetarët.
Qytetarët duhet të dinë se aplikimi kryhet pranë zyrave të koncesionarit dhe pranë zyrave të Komisariateve të Policisë.
Për të shmangur radhët e gjata dhe rrezikun nga koronavirusi, aplikimi do të bëhet vetëm pas një caktimi të orarit, ku qytetarët do të paraqiten pranë zyrave të aplikimit.
Ministri Lleshaj në një nga pikat e aplikimit:
Dhe për këtë, duke filluar nga java tjetër do të jetë në dispozicion një aplikacion, i cili u mundëson qytetarëve, të aplikojnë duke caktuar paraprakisht orarin e paraqitjes pranë zyrës përkatëse, në Komisariatin e Policisë apo pranë koncesionarit ku aplikohet për pasaporta. Theksoj edhe njëherë se është e rëndësishme që paraqitja pranë zyrave të bëhet vetëm pasi është bërë aplikimi dhe pasi është marrë orari përkatës, përndryshe nuk do të ofrohet shërbim, pa këtë kusht të plotësuar.
