Askush nuk do ta mendonte se në Shqipëri ekziston profesioni i detektivëve privatë që gjurmojnë bashkëshortët për të zbuluar nëse ka tradhti, aq më pak që ka edhe femra që e ushtrojnë këtë profesion.
Shkëndije Lili është detektivja e parë femër në Shqipëri, që ka mbaruar shkollën për këtë zanat. E ftuar në studion e “Pasdite në Top Channel”, ajo rrëfeu se hapat e parë në këtë profesion nuk kanë qenë të thjeshtë dhe aq më tepër të bindte familjarët.
“Ishte e vështirë t’i bindje, por unë ndërkohë isha regjistruar në shkollë. Ndërsa shoqëria më njihte tipin dhe ata e dinin që mund ta bëja, por prapë më shihnin të habitur”, u shpreh Lili, e cila punësohet ndër të tjera edhe për të zbuluar tradhtitë bashkëshortore
Përsa i përket kategorive që janë më shumë të interesuar në shërbimet e saj, detektivja rrëfeu se ndonëse mendohet se femrat janë shumë xheloze, në fakt meshkujt janë ata që e kontaktojnë më shumë. “Në përgjithësi ka dhe femra dhe meshkuj të cilët duan të dinë, por në numër më të madh janë meshkujt”, u shpreh detektivja.
