Mëngjesin e sotëm, ka mbërritur në Portin e Shëngjinit 8 emigrantë të tjerë të cilët u kapën në brigjet e Siçilisë (6 nga e Egjipti dhe 2 nga Bangladeshi), sipas marrëveshjes me Italinë.
Rreth orës 08:00, anija Libra u ankorua në Portin e Shëngjinit dhe 8 emigrantët janë vendosur në qendrën pritëse ku do t’iu nënshtrohen procedurave të verifikimit dhe kontrollit shëndetësor dhe më pas do të transferohen në kampin e Gjadrit. Anija u nis ditën e mërkurë nga brigjet e Lampeduses dhe mbërriti këtë mëngjes në Shëngjin.
Fillimisht ishin përzgjedhur që të vinin nëntë persona, por një burrë bengalez është konsideruar shumë i moshuar dhe me gjendje shëndetësore jo të mirë.
Ky është grupi i dytë i emigrantëve që mbërrijnë në vendin tonë. Grupi i parë i emigrantëve të cilët mbërritën më 16 tetor qëndruan vetëm tre ditë në Shqipëri, pasi Gjykata e Romës detyroi Italinë të kthejë mbrapsht kontigjentin e azilkërkuesve, pasi nuk vinin nga vende të sigurta.
