“Babai im është një vlerë e rrallë e shoqërisë shqiptare dhe më vjen shumë mirë që unë ekspozohem në krahët e tij”, kështu e nisi rrëfimin Bojken Lako për të atin e tij të ndjerë, të madhin Bujar Lako.
Artisti tregoi në emisionin “Dola te Ola” se Bujarit nuk i pëlqenin titujt, edhe pse ata nuk patën munguar gjatë gjithë karrierës së tij.
“Nuk donte që karriera e tij të ndikonte te karriera ime”, u shpreh Bojken duke treguar për marrëdhënien e mirë që ka patur me të atin.
Ai rrëfeu se ka marrë gjithmonë nëpër shfaqje teatrale, por jo nëpër sete xhirimesh dhe i vjen mirë që roli i fundit i babait të tij ishte në teatër, shfaqje nga e cila mori edhe “Çmimin e Karrierës” pasi u nda nga jeta.
Bojkeni tregoi se kanë qenë një familje shumë e vogël dhe prindërit e tij kanë pasur një marrëdhënie shumë të mirë.
I madhi Bujar Lako humbi jetën në moshën 70-vjeçare në vitin 2016 si pasojë e atakut kardiak duke lënë pas një zbrazëti jo vetëm tek familjarët e tij, por dhe në të gjithë artin shqiptar.
Ai u nderua me shumë çmime, dhe në vitin 2013 iu dha titulli “Nderi i Kombit” nga Presidenti i Republikës.
